Սիրելի «Նոր Օր»ականներ,
Ջերմօրէն կը շնորհաւորեմ Ձեր մէկտեղումը «Նոր Օր»ի շուրջ, ա՛յն մամուլին, որ մտաւորական-հրապարակագրական հսկայ պաշարի շտեմարան մը դարձած էր, իր գաղափարական, հայրենասիրական, ազգային-քաղաքական բովանդակութեամբ ու նպատակասլացութեամբ։
«Նոր Օր»ը ազատական-ռամկավարութեան հարազատ խօսափողներէն է, ինչպէս մօտիկ անցեալի «Զարթօնք»ը, եւ կոչուած է այդպէս մնալու Ձեզի նման նուիրեալ խմբագրական կազմով եւ աշխատակիցներու ընտրանի հոյլով։
«Նոր Օր»ը պէտք է մնայ կանգուն ու պատնէշի վրայ, որովհետեւ իր ձայնը անհրաժեշտութիւն մըն է Ամերիկայի թէ այլ գաղութներու մէջ, իսկ դուք անոր կրողներն ու շարունակողները ըլլալու կոչուած էք։
Նոր Տարուան սեմին, առաւելագոյն յաջողութիւններ եւ ամենայն բարիք բոլորիդ-բոլորիս, «Նոր Օր»եան լաւագոյն բարեմաղթութիւններով։
ՊԱՐՈՅՐ Յ. ԱՂՊԱՇԵԱՆ
Պէյրութ, 14 Դեկտեմբեր 2016