28 Յունուար 2017, Շաբաթ օր, Փասատինա քաղաքի Ս. Գրիգոր Լուսաւորիչ շաբաթօրեայ վարժարանը տօնեց «Բանակի Օր»՝ հայկական յաղթական բանակի հաստատման 25-ամեակը: Այդ օր աշակերտները դպրոց եկած էին կանաչ տաբատներ եւ շապիկներ հագած ու բոլորը դարձած էին մէյ-մէկ հայ զինուոր:
Յայտագրի առաջին բաժինը տեղի ունեցաւ եկեղեցւոյ բակին մէջ, խաչքարին առջեւ: Վարժարանի 40 աշակերտները յարգանքի տուրք մատուցին զոհուած զինուորներուն յիշատակին, տեղի ունեցաւ ծաղիկներու խոնարհում եւ խունկի բարձրացող գուլաներու հետ պատանիները միաբերան աղօթեցին «Տէ’ր, Ողորմեա’»ն եւ Տէրունական աղօթքը:
Յայտագրի երկրորդ բաժինը տեղի ունեցաւ Տունայեանց սրահին մէջ: Աշակերտները նախ դիտեցին Երեւանի մէջ տեղի ունեցած ռազմական շքերթի տեսաերիզը: Փոքրիկները զարմանքով մնացին երբ օդուժը երկինքը Եռագոյն ներկեց: Անոնք նաեւ հիացումով դիտեցին «Հրացաններու պար»ը, ուր զինուորներու ընտրանի մը սպիտակ հրացաններով կը կատարէր յատուկ ցուցադրութիւն: Ապա երկու սկաուտներ բեմի վրայ պատուով բարձրացուցին հայկական դրօշակը, ու աշակերտները միասիրտ երգեցին հայրենասիրական երգեր եւ Հայաստանի օրհներգը:
Ընթացքին հանդէս եկաւ վարժարանի տնօրէն Պրն. Նորայր Տատուրեանը: Ան հարց-պատասխանի ձեւով հայկական զինուած ուժերու մասին հետաքրքրական թիւեր եւ տուալներ փոխանցեց աշակերտներուն: Իսկ իր եզրափակիչ պատգամին մէջ տնօրէն Ն. Տատուրեան ըսաւ. «Սփիւռքահայ ամէն աշակերտ զինուոր է: Քու զէնքդ քու մատիտդ է, գիրքդ եւ տետրակդ: Քանի որ ամէն շաբաթ դուն կու գաս հայկական վարժարան, կը կարդաս հայերէն, կը գրես հայերէն, կ’երգես, կ’արտասանես հայերէն՝ դուն պաշտպանն ես մ
այրենիի»:
Հանդիսութեան աւարտին սրահ բերուեցաւ բանակի օրուան կարկանդակը, որ զարդարուած էր «Հզօր բանակ, հզօր Հայաստան» գրութեամբ: Կարկանդակը կտրուեցաւ ոյժ, կորով եւ խաղաղ ծառայութիւն մաղթելով հայրենիքը պաշտպանող զինուորներուն:
Այս խանդավառ եւ տօնական միջոցառումը գալ շաբաթ կ’ունենայ իր յաջորդ հանգրուանը: Աւագ դասարանի աշակերտները նամակներ պիտի գրեն սահմանապահ զինուորներուն: Նամակները Հայաստանի հիւպատոսարանի միջնորդութեամբ պիտի հասնին զօրամասեր:
Փասատինայի Ս. Գրիգոր Լուսաւորիչ շաբաթօրեայ վարժարանը ունի կիսադարեան պատմութիւն: Ան Սան Կապրիէլ հովիտի հայորդիներուն կու տայ հայեցի դաստիարակութիւն: Աշակերտները հայերէնի առընթեր կը սորվին հայոց պատմութիւնը, մշակոյթը եւ աւանդութիւնները:
ԹՂԹԱԿՑՈՒԹԻՒՆԸ ՎԱՐԺԱՐԱՆԷՆ