Հինգշաբթի, Դեկտեմբեր 8, 2022

Շաբաթաթերթ

Array

Նախագահ Թրամփ կ՚արգիլէ եօթը երկիրներու մահմետականներու մուտքը Միացեալ Նահանգներ

Անցեալ Շաբաթ օր ԱՄՆ-ի նախագահ Տանըլտ Թրամփ հրահանգած է անորոշ ժամանակով արգիլել սուրիացի գաղթականներու մուտքը Միացեալ Նահանգներ, ինչպէս նաեւ  կեցնել շարք մը իսլամական երկիրներու քաղաքացիներուն այցելութիւնը ԱՄՆ։

Խոստանալով երկիրը պաշտպանել «օտարերկրեայ ահաբեկիչներէ», Թրամփ հրամայած է 90 օրով կասեցնել ներգաղթը Սուրիայէն, Իրանէն, Իրաքէն, Լիպիայէն, Սոմալիէն, Սուտանէն եւ Եմէնէն, մինչեւ ներգաղթողներու «մանրազնին ստուգման» ձեւաչափերու ստեղծումը։ Թրամփ բացառութիւն ըրած է Սուրիոյ քրիստոնեաներուն համար, որոնք, անոր խօսքերով, հետապնդումներու կ՚ենթարկուին իրենց հայրենիքին մէջ։

Իրաւապաշտպան կազմակերպութիւններ քննադատած են ԱՄՆ-ի նախագահին նախաձեռնած քայլերը, պնդելով, որ անոնք խտրականութիւն կը պարունակեն իսլամութեան նկատմամբ եւ կը հակասեն ԱՄՆ-ի սահմանադրութեան։

Իրանի քննադատութիւնները Թրամփին

«Այժմ պատեր կառուցելու ժամանակը չէ», յայտարարած է Իրանի նախագահ Հասան Ռոհանին,  քննադատելով ԱՄՆ-ի նախագահ Թրամփի իսլամական եօթը երկիրներէ ներգաղթողներու հոսքը սահմանափակող վերջին հրամանագիրը։

«Այդ մարդիկ մռռցած են, որ Պերլինի պատը քանդուած է շատ տարիներ առաջ։ Նոյնիսկ եթէ այսօր ժողովուրդներու միջեւ կան բաժանարար գիծեր, անոնք պէտք է վերացնել», նշած է Ռոհանի։

Նոպէլեան մրցանակակիրները ընդդէմ Թրամփի

Նոպէլեան մրցանակի 11 դափնեկիր եւ գիտական հանրութեան հազարաւոր ներկայացուցիչներ դատապարտած են ԱՄՆ-ի նախագահ Տանըլտ Թրամփի հրամանագիրը գաղթականներու մուտքը կասեցնելու մասին։

Անոնք խտրականութիւն կը համարեն հրամանագիրը եւ վնասակար՝ ԱՄՆ-ի ազգային շահերուն համար։

Իրականութեան մէջ Թրամփի հրամանագիրը յստակօրէն չ՚ըսեր, թէ գաղթականներուն թիւը պիտի նուազի, այլ՝ կ՚ըսուի թէ կը քննարկուի կրօնական փոքրամասնութիւններու նախապատուութիւն տալ, որոնք հետանդումներու կ՚ենթարկուին։

Ի դէպ, Սենաթի Դեմոկրատական կուսակցութեան փոքրամասնութեան առաջնորդ Չարլզ Շումըրը նոյնպէս դատապարտած է նախագահ Թրամփի որոշումը։

 

ՅԱՐԱԿԻՑ ՅՈԴՈՒԱԾՆԵՐ

ՆՈՐ ՅԱՒԵԼՈՒՄՆԵՐ