Երեքշաբթի, Մայիս 21, 2024

Շաբաթաթերթ

Նոր Մրցանակակիր «Հայկ Նագգաշեան» Գրական Գնահատանքի Հիմնադրամի Տեսողութեամբ

ՆՈՐ ՕՐ, ԼՈՍ ԱՆՃԵԼԸՍ.- 2019-ի Հոկտեմբերի 7-ին Հայաստանի Գրողների միութեան կլոր սրահում տեղի ունեցաւ «Հայկ Նագգաշեան» գրական գնահատանք միջազգային մրցոյթի երկրորդ մրցանակաբաշխութիւնը: Սփիւռքահայ արձակագիր եւ ընկերային գործիչ Հայկ Նագգաշեանի անունով ստեղծուած գրական գնահատանքի այս հիմնադրամը ստեղծուել է Նագգաշեան ընտանիքի` մասնաւորաբար գրողի այրու`Սօսի Նագգաշեանի եւ նրա որդիների` Վահան եւ Շահէ Նագգաշեանների նախաձեռնութեամբ եւ անմիջական հովանու ներքոյ: Հիմնադրամի ստեղծման նպատակն է ոչ միայն վառ պահել Հայկ Նագգաշեանի յիշատակը, այլեւ խրախուսել եւ ըստ արժանւոյն գնահատել հին եւ նոր սերնդի ստեղծագործողներին: 

 

  «Հայկ Նագգաշեան» գրական գնահատանքի հիմնադրամի յաձնախմբի նախագահն է ՀՊՄՀ հայ նոր եւ նորագոյն գրականութեան ամբիոնի վարիչ, «Սփիւռք» Գիտաուսումնական կենտրոնի տնօրէն Սուրէն Դանիէլեանը, գնահատող յանձնախմբի անդամներն են` Հայ Առաքելական եկեղեցու Տաւուշի թեմի առաջնորդ Բագրատ եպիսկոպոս Գալստանեանը, լիբանանահայ գրող Արամ Սեփեթճեանը, կանադահայ բազմամեայ ուսուցչուհի Սօսի Նագգաշեանը, սաղիմահայ բանաստեղծուհի Անուշ Նագգաշեանը, ՀՊՄՀ հայ նոր եւ նորագոյն գրականութեան ամբիոնի դասախօս Քնարիկ Աբրահամեանը:

 

Հայաստանի Գրողների միութեան նախագահ Եդուարդ Միլիտոնեանը, ողջունելով ներկաներին, նշեց, որ Հայկ Նագգաշեանը հայ գրականութեան մէջ իր իւրայատուկ ձեռագիրն ունեցած արձակագիրներից է, որոնց թողած գրական ժառանգութիւնը դեռ պէտք է ոգեշնչի  հայ ընթերցողին եւ մասնաւորապէս ստեղծագործական հակում ունեցող շնորհալի ուժերի: Նախագահը խոստովանեց, որ ժամանակին տարուած է եղել արձակագրի աֆրիկեան որսորդական արկածային ոճի հարուստ պատմուածքներով: ՀԳՄ նախագահը իր շնորհակալական խօսքն ուղղեց նաեւ Նագգաշեան ընտանիքին` ընդգծելով, որ ստեղծագործող մարդը, յիրաւի, բոլոր ժամանակներում կարօտ է նմանատիպ ուշադրութեան եւ գնահատանքի, եւ «Հայկ Նագգաշեան գրական գնահատանքի հիմնադրամ»ի կողմից իրականացուող այս մրցանակաբաշխութիւնը ոգեւորութեան նոր ալիք կը բերի իր հետ:

 

Բացման խօսքում Փրոֆ. Սուրէն Դանիէլեանը նկատեց, որ այս տարի մրցոյթը միջազգային կարծես չստացուեց, քանի որ բոլոր մասնակիցները Հայաստանից էին, սակայն իր խորքի մէջ այն բաւական  տարողունակ եւ բարդ բնոյթ ունէր, քան անցեալ տարի: Եթէ նախորդ տարի մրցոյթին մասնակցում էր երկու ստեղծագործող, ապա այս տարի յաւակնորդների թիւը ութն էր, ընդ որում` այս տարուայ յաւակնորդները մեր գրական կեանքում արդէն իրենց դիմագիծը կերտած անհատականութիւններ էին, ինչը աւելի է դժուարացրել յանձնաժողովի անդամների առջեւ դրուած խնդիրը: Ս. Դանիէլեանը յաւելեց, որ «Հայկ Նագգաշեան» գրական գնահատանքի հիմնադրամին նման յախուռն մասնակցութիւնը միանգամից բարձրացնում է այս մրցոյթի նշաձողը գրական կեանքում եւ զօրացնում Սփիւռքի մէջ գրական վաստակով, ընկերային եւ քաղաքական կեանքում աչքի ընկած գործիչ Հայկ Նագգաշեանի դերակատարութիւնը եւ ներկայութիւնը գրամշակութայիւն անգամ նորօրեայ զարգացումներում:

 

Ներկաներին իր օրհնութեան խօսքը բերեց նաեւ Հայ Առաքելական եկեղեցու Տաւուշի թեմի առաջնորդ, յանձնախմբի անդամ  Բագրատ Եպս. Գալստանեանը: Նա նշեց, որ իրեն  մշտապէս հիացրել է այս ընտանիքը` հայկական մշակոյթի եւ աւանդոյթների նկատմամբ ունեցած պաշտամունքով եւ այս հիմնադրամի ստեղծումը եւս այդ նուիրումի վկայութիւնն է: Նման գնահատութիւնների շնորհիւ է, որ մեր երիտասարդ գրողները պէտք է ոգեշնչուեն եւ յետագայում լրացնեն մեր մեծերի շարքերը:

 

Անուանի բանաստեղծուհի, յանձնախմբի անդամ Անուշ Նագգաշեանը ներկայացրեց Նագգաշեան գերդաստանի գործունէութիւնը. ուսուցչութիւնը կարծես իրենց մեծ պապի արեան հետ փոխանցուել է սերնդէ սերունդ եւ աշխարհի տարբեր ծագերում յայտնուած Նագգաշեանները նոյն նուիրումով  են ծառայում հայ գիրին եւ գրականութեանը: Նա յաւելեց, որ այս մրցանակաբաշխութիւնը իւրատեսակ յարգանքի տուրք է սփիւռքահայ գրագէտ Հայկ Նագգաշեանին, նրա թողած հարուստ գրական ժառանգութեանը:

 

Այս տարի «Հայկ Նագգաշեան» գրական գնահատանքի հիմնադրամի մրցոյթի յաւակնորդներն էին թատերագիր Անուշ Ասլիբեկեանը («Թռիչք քաղաքի վրայով»), արձակագիր Հերմինէ Աւագեանը  («Պատերազմ…, աչքեր…, ծաղիկներ…»), Արտեոմ Գրիգորեանը («Գնացք դէպի Արեւմուտք»), Յովհաննէս Երանեանը («Մահացու հիւրախաղ»), բանաստեղծ Յուսիկ Արան («Եւ սէրը ասաց»), Լեւոն Շահնուրը («Ցաւեր բռնողը») եւ Նորայր Սարգսեանը  («Չինական պատ»):

 

Մրցոյթի յանձնախմբի անդամները միաձայն առաջին մրցանակը շնորհել էին Յուսիկ Արային` «Եւ սէրը ասաց» բանաստեղծական հատորի համար:

 

Հանդիսութեան աւարտին «Հայկ Նագգաշեան» գրական գնահատանքի հիմնադրամի հիմնադիր, յանձնախմբի անդամ Տիկ. Սօսի Նագգաշեանը իր շնորհակալական խօսքն ուղղեց յանձնախմբի անդամներին, որոնք կարդացել են բոլոր գրքերը եւ որոշել արժանաւորին: Ս. Նագգաշեանը, դիմելով նոր սերնդի գրողներին, մաղթեց, որպէսզի նրանք երբեք չյուսահատուեն, շարունակեն սպիտակ թղթին յանձնել իրենց մտորումներն ու ապրումները եւ իրենց ստեղծագործութիւններով հարստացնեն հայ գրական ածուն:

ՆԵԼԼԻ ԹԱԴԵՒՈՍԵԱՆ

ՅԱՐԱԿԻՑ ՅՈԴՈՒԱԾՆԵՐ

ՆՈՐ ՅԱՒԵԼՈՒՄՆԵՐ