Սիրելի բարեպաշտ ժողովուրդ,
Մուտք ենք գործում Մեծ Պահքի շրջան, որը աղօթքի, խոկման ու ներհայեցողութեան առանձնակի ժամանակամիջոց է։ Այս օրերին մեր ներաշխարհը պայծառանում ու զօրանում է սուրբգրային ընթերցումներով, հոգեշահ պատգամներով, որ փոխանցում են Մեծ Պահքի կիրակիների խորհուրդները։ Քրիստոնեաներիս համար Մեծ Պահքը իւրայատուկ հոգեւոր ճամփորդութիւն է, որպէսզի մեր կենցաղավարութեանը անդրադարձով, մարդկային մեր էութեան քննութեամբ, հոգեպէս նորոգուած ու բարեպաշտ ընթացքով արժանի դառնանք տէրունապարգեւ փրկութեան բաղձալի պարգեւին: Առաքեալը պատուիրում է ընթանալ Աստծոյ կամքի համաձայն` «ապրելու համար Տիրոջն արժանի եւ ամէն ինչում Նրան հաճելի ձեւով, բոլոր բարի գործերում պտղաբեր լինելու» (Կող․ Ա 9-10):
Խորհրդաշատ այս ժամանակաշրջանը, սիրելի զաւակներ Մեր, լաւագոյն առիթն է վերստին ամրապնդելու միմեանց հանդէպ սէրն ու յարգանքը, լաւագոյն առիթն է զօրացնելու մեզանում հանդուրժողականութեան ու փոխըմբռնման ոգին՝ մեր մտահայեացքի առջեւ ունենալով Սուրբ Գրքի պատգամը, որ եղբայրսիրութիւնը դէպի Աստուած օրհնեալ ճանապարհն է (հմմտ․ Ա Հովհ․ Դ 20-21): Եղբայրսիրութեամբ պիտի զօրացնենք մեր միասնականութիւնը Հայրենիքում եւ Սփիւռքում, ազգային եւ ներեկեղեցական մեր կեանքում հաստատենք փոխհասկացութեան ու գործակցութեան ոգին եւ առ Աստուած ապաւինութեամբ կերտենք արդար ու լուսաւոր գալիքը մեր ժողովրդի: Արդարեւ, սէրը քրիստոնէական առաքինութիւնների բարձունքն է։ Տէրունապատուէր այս սէրն է ազգային ու հայրենական անդաստանում, ընտանեկան ու հասարակական կեանքում խաղաղութեան ու բարօրութեան ապահովման լաւագոյն գրաւականը:
Մեր յորդորն ենք բերում մեր Սուրբ Եկեղեցու հաւատաւոր, սիրեցեալ զաւակներիդ՝ Մեծ Պահքի կարեւոր այս շրջանն անցկացնելու աղօթքով, պահեցողութեամբ ու խոկումներով, մասնակցելու մեր եկեղեցիներում կատարուող սրբազան արարողութիւններին, զօրացնելու միմեանց հանդէպ կամեցողութեան ոգին, առատացնելու բարի գործերը, որպէսզի առաւել շէնանայ ու պայծառանայ մեր կեանքը Աստուածաշնորհ օրհնութիւններով: Մեր աղօթքը առ Աստուած բարձրացնենք Մերձաւոր Արեւելքում, մասնաւորապէս Լիբանանում, Սիրիայում եւ Իրաքում բնակուող մերազնեայ զաւակների՝ մեր եղբայրների ու քոյրերի եւ բոլոր ժողովուրդների համար, ովքեր տարիներ շարունակ ապրում են պատերազմական դժուարութիւնների եւ քաղաքական ալեկոծութիւնների մէջ:
Երկնաւոր Տիրոջ օրհնութեան հայցով մաղթենք խաղաղութիւն աշխարհին, մարդկանց սրտերին, խաղաղութիւն մեր հայրենիքին ու մեր ժողովրդին, ինչպէս եւ՝ հաւատքի, հոգեւոր կեանքի պայծառութիւն, առաջընթաց ու զօրացում աշխարհասփիւռ ազգիս հայոց։
Թող մեր Փրկիչ Յիսուս Քրիստոսի սէրն ու ողորմութիւնը միշտ լինեն մեզ հետ եւ ամէնքի․ ամէն։
Օրհնութեամբ՝
ԳԱՐԵԳԻՆ Բ
ԿԱԹՈՂԻԿՈՍ ԱՄԵՆԱՅՆ ՀԱՅՈՑ