Բարձր պահանջարկի շնորհիւ, երկրորդ անգամով համայնքին պիտի ներկայացուի ԲԺԻՇԿ ՎԱՐԴԱՆ ԹԱՇՃԵԱՆի ամենավերջին լոյս տեսած «ԳԱՂԹԱԿԱՅԱՆԷՆ ԲԺՇԿՈՒԹԻՒՆ՝ Անտունի դարմանող անտունին» հատորը՝ Երեքշաբթի, Մարտ 24, 2020, երեկոյեան ժամը 7:30ին, Ապրիլ Գրատան մէջ: Ելոյթ պիտի ունենան Օշին Քէշիշեանը, Յարութիւն Արմէնեանը եւ Յարութ Տէր Դաւիթեանը։
ԳԱՂԹԱԿԱՅԱՆԷՆ ԲԺՇԿՈՒԹԻՒՆ գիրքը կը ներկայացնէ հեղինակ Վարդան Թաշճեանի կեանքը։ Ծնած է 1933-ին, Պէյրութի արուարձաններէն Պուրճ Համուտի Թիրօ թաղի գաղթակայանին մէջ, որուն բնակիչները ամբողջութեամբ կը բաղկանային Ցեղասպանութենէն մազապուրծ հայերէ: Փայտաշէն ու թիթեղաշէն խրճիթներէ կազմուած գաղթակայան մը, ուր անցան կեանքին առաջին 27 տարիները՝ մթութեան, աղմուկի, աղքատութեան և մտահոգիչ հիւանդութիւններու մթնոլորտին մէջը անցուց: Պատանութեան տարիներէն սկսեալ զինք կը հրապուրէր բժշկական ասպարէզը, որ այդքան ալ դիւրամատչելի չէր թուեր. մանաւանդ իր ուսումնական երկարատեւ և ծախսալից անխուսափելի պարտադրանքով: Սակայն, ի հեճուկս խոչընդոտող անպատեհութիւններուն, երբեմն հրաշքով, յաճախ դիպուածով բայց միշտ յամառ կամքով և յարատեւ աշխատանքով կարելի եղաւ հասնիլ նպատակին. գաղթակայանէն բժշկութիւն:
ԲԺԻՇԿ ՎԱՐԴԱՆ ԹԱՇՃԵԱՆը ծնած է Պէյրութ, Լիբանան։ Վկայուած է ֆրանսական Սեն Ժոզէֆ համալսարանէն եւ դարձած ծանօթ մանկաբոյժ։ Երկրին քաղաքացիական պատերազմին իբրեւ հետեւանք՝ հաստատուած Միացեալ Նահանգներ, Քալիֆորնիա, ուր 1989ին ստացած է ընդհանուր բժշկութեան եւ վիրաբուժութեան արտօնագիրին եւ կը շարունակէ գործել մինչեւ այսօր։ Սկիզբէն եւ մօտէն առնչութիւն ունեցողներէն եղած է հայ բժիշկներու համաշխարհային գործունէութիւններուն հետ։
Կազմակերպուած Ապրիլ Գրատան կողմէ.