Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը օգոստոսի 3-ին հեռակապով հանդիպում ունեցաւ Հիւսիսային Ամերիկայի Հայոց Եկեղեցու թեմակալ առաջնորդների հետ։
Հանդիպմանը մասնակցում էին ԱՄՆ Հայոց Արեւմտեան թեմի առաջնորդ Տ․ Յովնան արքեպիսկոպոս Տէրտէրեանը, ԱՄՆ Հայոց Արեւելեան թեմի առաջնորդ Տ․ Դանիէլ եպիսկոպոս Ֆընտըգեանը եւ Գանատայի հայոց թեմի առաջնորդ Տ․ Աբգար եպիսկոպոս Յովակիմեանը։
Հեռավար հանդիպմանը մասնաւոր անդրադարձ կատարուեց օրեր առաջ Հայրենիքում՝ Տաւուշի մարզում, հայ-ատրպէյճանական սահմանի վրայ տեղ գտած ռազմական գործողութիւններին։ Վեհափառ Հայրապետը լուսաբանութիւններ տուեց վերջին զարգացումների շուրջ՝ աղօթքով յիշելով յանուն հայրենիքի խաղաղութեան եւ անվտանգութեան նահատակուած հայորդիներին։ Նորին Սրբութիւնը խօսեց նաեւ այս առիթով տարբեր երկրներում Ադրբեջանի հրահրմամբ տեղի ունեցող ազգամիջեան բախումների եւ համայնքներում տիրող իրավիճակի մասին՝ տեղեկացնելով, որ իրենց հետ հաղորդակցութիւն պահպանելուց բացի՝ մշտական կապի մէջ է եղել Եւրոպայի ու Ռուսաստանի թեմակալների հետ։
Գարեգին Երկրորդ Հայրապետն իր գնահատանքը յայտնեց տարբեր քաղաքներում թեմակալ առաջնորդների եւ հոգեւորականների ունեցած կարեւոր դերակատարութեան առնչութեամբ, որի շնորհիւ յաջողուել է պաշտպանել հայ համայնքները եւ պատշաճ վարքագիծ դրսեւորել ազգամիջեան լարուածութեան յաղթահարման համար։ Դատապարտելով ադրբեջանական այս քաղաքականութիւնը՝ Ամենայն Հայոց Կաթողիկոսը յորդորեց շարունակել միջոցներ ձեռնարկել՝ թոյլ չտալու մեր ժողովրդին տրուելու սադրանքների։
Նորին Սրբութիւնը մասնաւորապէս ընդգծեց անհրաժեշտութիւնը Սփիւռքի կառոյցների միջեւ գործակցութեան զօրացման ու համախմբման, ինչպէս նաեւ Հայրենիքի կապերի սերտացման եւ ամրապնդման։ «Այս դժուարին օրերին Հայրենիքը պէտք ունի իր իւրաքանչիւր զաւակի զօրակցութեան», – նշեց Հայոց Հայրապետը։
Իրենց հերթին թեմակալ առաջնորդները զօրակցութիւն յայտնեցին Հայոց Հովուապետին եւ հայրենաբնակ ժողովրդին՝ հաստատելով, որ Սփիւռքն ապահով է միայն Հայաստանի հզօրութեամբ, անվտնագութեամբ եւ առաջընթացով, եւ կարեւորեցին համազգային միասնականութիւնը։
Զրոյցի ընթացքում թեմակալները Ամենայն Հայոց Կաթողիկոսին նաեւ տեղեկութիւններ փոխանցեցին թեմերի եւ ծուխերի ներկայիս վիճակի, եկեղեցիներում աստուածպաշտութեան կազմակերպման եւ համաւարակի հետեւանքների յաղթահարման ուղղութեամբ ձեռնարկուող աշխատանքների վերաբերեալ։ Այս առնչութեամբ Հայոց Հովուապետը, կարեւորելով այս ծանր շրջանում թեմակալների եւ հովիւների մատուցած ծառայութիւնը իրենց հոգեւոր խնամքի ներքոյ գտնուող ազգի զաւակներին, իր հայրապետական օրհնութիւնն ու գնահատանքը փոխանցեց թեմերում սպասաւորող հոգեւոր դասին։ Նորին Սրբութիւնն ընդգծեց, որ Մայր Աթոռը զօրավիգ է իւրաքանչիւր հայորդու եւ պիտի շարունակի իր զօրակցութիւնը բերել թեմակալ առաջնորդներին իրենց հոգեւոր եւ ազգապահպան աստուածահաճոյ առաքելութեան մէջ։ Հայոց Հովուապետը առաջնորդներին նաեւ ներկայացրեց հարենիքում Մայր Աթոռ Սուրբ Էջմիածնի կողմից իրականացուած սոցիալական, կրթական եւ առողջապահական ծրագրերը՝ բարձրօրէն գնահատելով այդ ծրագրերի իրագործման համար ընծայաբերումներ կատարած թեմերի եւ անհատ բարերարների յանձնառութիւնները։
Հանդիպմանը մտահոգութիւն արտայայտուեց նաեւ Հայրենիքում կրթական բարեփոխումների գործընթացի, ինչպէս եւ հանրակրթական դպրոցից «Հայոց Եկեղեցու պատմութիւն» առարկայի դուրսբերման շուրջ։
Քննարկուեցին թեմական կեանքին առնչուող տարբեր հարցեր, Եկեղեցու առջեւ ծառացած մարտահրաւէրներ եւ դրանց արդիւնաւէտ յաղթահարման ուղիներ։
Զրոյցն ամփոփուեց Ամենայն Հայոց Հայրապետի «Պահպանիչ» աղօթքով եւ մաղթանքով, որ Երկնաւոր Տէրը խաղաղ ու անվտանգ պահի Հայոց աշխարհը եւ օրհնի հայոց ազգը ի հայրենիս եւ ի սփիւռս՝ զօրավիգ լինելով ազգային մեր իղձերի ու նպատակների իրագործման ճանապարհին։