Կնոջ Դէմքին Վրայ Մազի Աճ՝ 37 Տարի Ծխելէն Ետք
«The New England Journal of Medicine» բժշկական ամսագիրը հրապարակած է դէպք մը, ուր նկարագրուած է, որ Աւստրալիոյ Մելպուռն քաղաքէն 51 տարեկան կնոջ մը դէմքը ծածկուած է մազով:
Հիւանդը մաշկաբանին դիմած է, երբ անոր դէմքը, վիզը եւ մարմինի վերին մասը ծածկուած են բարակ մազով, որ կը կոչուի «լանուկօ»: Անոր նաեւ անհանգստացուցած են յոգնածութիւնը, հազը եւ կշիռքի կորուստը:
Բժիշկները հիւանդին աջ թոքին մէջ յայտնաբերած են 12 միլիմեթր «ատենոքարսինոմա» (չարորակ ուռուցք), որ կրնայ յայտնուիլ ծխելու հետեւանքով: Ի յայտ եկած է, որ կինը 37 տարի ծխած է:
Հիւանդը ստացած է «քիմոթերափի» եւ ճառագայթային «թերափի», այնուհետեւ դեղերու բուժում, որ նախատեսուած են թոքերու քաղցկեղի դէմ պայքարելու համար: Բուժումը սկսելէն 2 ամիս ետք, մազերու աճը դանդաղած է, կշիռքի կորուստի խնդիրը լուծուած է եւ հազը վերացած:
«Ճինճըր»-ը Ամէնէն Առողջարար Ըմպելիքներէն Մէկը. Մասնագէտներ
«Ճինճըր»-ի թէյը շարք մը բուժիչ յատկութիւններ ունի, այդ շարքին` «քոլեսթերոլ»-ի մակարդակի եւ քաղցկեղի յառաջացման հաւանականութեան նուազեցումը: «Ճինճըր»-ը կրնայ նաեւ նուազեցնել յօդացաւերը: Այս մասին գրած է Express-ը` վկայակոչելով Ամերիկայի Միացեալ Նահանգներու Բժշկական ազգային գրադարանը:
Բազմաթիւ հետազօտութիւններու արդիւնքներու համաձայն` «Ճինճըր»-ը հակաքաղցկեղային յատկութիւններ ունի իր արմատներուն մէջ գտնուող «ճինճըրոլ» նիւթին շնորհիւ: Գիտնականները պարզած են, որ «Ճինճըր»-ը երկու անգամ աւելի առողջարար է, երբ կ՛օգտագործուի կանաչ թէյի հետ:
Հետազօտութիւնը ցոյց տուած է, որ 30 մարդու մօտ, որոնք օրական 2 կրամ «Ճինճըր»-ի «էքսթրէքթ» օգտագործած են, զգալիօրէն նուազած է աղիքներու քաղցկեղի զարգացման վտանգը:
«Ճինճըր»-ը կ՛օգնէ նաեւ վերահսկելու արեան բարձր ճնշումը` ատոր մէջ գտնուող արիւնը բարակցնող «ասփիրին»-ի բաղադրիչի` «սալիսիլէյթ»-ի շնորհիւ:
Բացի ատկէ, եթէ «Ճինճըր»-ի օգտագործման համար հակացուցմունքեր չկան, անիկա կրնայ որպէս բնական միջոց օգտագործուիլ, որ կ՛օգնէ նուազեցնելու ցաւը եւ ամրապնդելու դիմադրողականութեան համակարգը, յայտնած են մասնագէտները: