Շաբաթ, 21 Օգոստոս, 2021-ին, օրհնութեամբ` Արեւմտեան Թեմիս Բարեխնամ Առաջնորդ` Գերաշնորհ Տ. Յովնան Արք. Տէրտէրեանի` տեղի ունեցաւ կիրակնօրեայ դպրոցներու գործունէութեանը վերաբերող ընդլայնուած համաժողովի նիստ, որուն իրենց մասնակցութիւնը բերեցին եօթանասունէն աւելի ուսուցիչներ` թէ Արեւմտեան եւ թէ Արեւելեան թեմերէն:
Ժողովի սկիզբին Առաջնորդ Սրբազան Հայրը ողջունեց ներկաները եւ գնահատանքով արտայայտուեցաւ Կիրակնօրեայ Դպրոցներու ուսուցիչներուն` նուիրեալ ու կամաւոր ծառայութեան համար, շեշտը դնելով եկեղեցւոյ ու մեր ժողովուրդի կեանքին մէջ անոնց ունեցած կենսական դերին վրայ:
Սրբազան Հօր օրհնութեան եւ ողջոյնի խօսքերէն յետոյ, մեկնարկեց համաժողովի նիստը, որը վարեց` Թեմի Կիրակնօրեայ Դպրոցներու խորհուրդի նորանշանակ նախագահ Արժ. Տ. Մեսրոպ Քհնյ. Աշը:
Համաժողովի ընթացքին Տ. Մեսրոպ Քհնյ. Աշը ներկայացուց խորհուրդի նոր կազմը, ինչպէս նաեւ այն նոր մշակուած ծրագիրը եւ մարտավարութիւնը, որը պէտք է գործադրուի 2021-2022 ուսումնական տարուայ համար: Մշակուած նոր ծրագրի բովանդակութիւնը ամենայն մանրամասնութեամբ ներկայացուեց` Առաջնորդարանի Միջ-եկեղեցական գրասենեակի պատասխանատու` Տիար Հայկ Մատոյեանի կողմէ:
Համաժողովի հիմնական թեմաներու քննարկումէն յետոյ` Տ. Մեսրոպ Քհնյ. Աշը հրաւիրեց օրուան բանախօսը, Մանսֆիլտի Սուրբ Գրիգոր Հոյն Ուղղափառ եկեղեցւոյ կիրակնօրեայ դպրոցի տնօրէն եւ ուսուցչուհի` Տիկին Դիան Կատինասը: Զրոյցի ընթացքին ան ժողովի մասնակիցներու հետ կիսուեց իր փորձառութեամբ, ներկայացնելով, թէ այսօր ինչպէս կարող ենք կառավարել եւ արդիւնաւէտ ձեւով փոխանցել մեր քրիստոնէական գիտելիքները աշակերտներուն:
Համաժողովի վերջաւորութեանը Գերաշնորհ Տ. Յովնան Արք. Տէրտէրեանը իր երախտագիտութիւնը յայտնեց տիկին Կատինասին` նիւթի ներկայացման համար, ինչպէս նաեւ շնորհակալութիւն յայտնեց բոլոր մասնակիցներուն եւ ուսուցիչներուն` իրենց նուիրումի ու մեր նոր սերունդին կրօնաբարոյական գիտելիքներուն հաղորդ պահելու համար։