Հինգշաբթի, 9 Դեկտեմբերի, 2021

Շաբաթաթերթ

Աւարտուեց Գերագոյն Հոգեւոր Խորհրդի Ժողովը

Նոյեմբերի 8-13-ը, նախագահութեամբ Ն. Ս. Օ. Տ. Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, Մայր Աթոռ Սուրբ Էջմիածնում տեղի ունեցաւ Գերագոյն հոգեւոր խորհրդի ժողովն ընդլայնուած կազմով:

Ժողովի նիստերը վարեցին Արեւմտեան Եւրոպայի Հայրապետական պատուիրակ եւ Վատիկանում Մայր Աթոռ Սուրբ Էջմիածնի ներկայացուցիչ Գերաշնորհ  Տ. Խաժակ արքեպիսկոպոս Պարսամեանը եւ Մայր Աթոռ Սուրբ Էջմիածնի դիւանապետ Գերաշնորհ Տ. Արշակ եպիսկոպոս Խաչատրեանը:

Ժողովին հրաւիրուած էր մասնակցելու Հայկական Բարեգործական Ընդհանուր Միութեան նախագահ Պերճ Սեդրակեանը:

Գերագոյն հոգեւոր խորհուրդն անդրադարձաւ արցախեան պատերազմի հետեւանքներին եւ դրանց յաղթահարման ուղղութեամբ իրականացուող աշխատանքներին: Այս առումով Արցախի թեմի առաջնորդ Գերաշնորհ Տ․  Վրթանես եպիսկոպոս Աբրահամեանը ներկայացրեց Արցախում տիրող իրավիճակը եւ առկայ մարտահրաւէրները` ի մասնաւորի կարեւորելով հոգեւոր, հոգեբանական եւ հումանիտար աջակցութեանն ուղղուած ծրագրերի իրականացումը: Առաջնորդ Սրբազանը կարեւորեց նաեւ Հայաստանից դէպի Արցախ պարբերաբար ուխտագնացութիւնների կազմակերպումը: Վրթանես Սրբազանը անդրադարձաւ Արցախի թեմում սպասաւորող քահանաների սոցիալական եւ հովուական ծառայութեանը, ընդգծելով այդ առաքելութեան կարեւորութիւնն ի նպաստ Արցախի մեր ժողովրդի հոգեւոր կեանքի զօրացման: 

Ժողովին քննութեան առնուեցին նաեւ Մայր Տաճարի հիմնանորոգութեան եւ ամրակայման աշխատանքները,  որոնց վերաբերեալ տեղեկութիւններ փոխանցեց Մայր Աթոռի վանական խորհրդի ատենապետ եւ լուսարարապետ Գերաշնորհ Տ. Մուշեղ եպիսկոպոս Բաբայեանը: Գերագոյն հոգեւոր խորհրդի անդամները ծանօթացան նաեւ տաճարի նորոգութեան ժամանակ ի յայտ եկած խնդիրներին: Տեղեկացուեց, որ, նկատի ունենալով վերականգնման եւ բարեկարգման աշխատանքների ընդհանուր ծաւալը եւ առաջացած նոր խնդիրները, Մայր Տաճարի հիմնանորոգութեան աշխատանքները հնարաւոր կը լինի աւարտին հասցնել 2022 թուականին:

Գարեգին Երկրորդ Ամենայն Հայոց Կաթողիկոսի, Մոսկուայի եւ Համայն Ռուսիոյ Կիրիլ ԱՅ Պատրիարքի եւ Կովկասի մահմեդականների վարչութեան նախագահ շէյխ-ուլ-իսլամ Ալլահշուքիւր Փաշայ Զադէի հետ հոկտեմբերի 13-ին Մոսկուայում տեղի ունեցած եռակողմ հանդիպմանն անդրադարձաւ Գերաշնորհ Տ. Նաթան արքեպիսկոպոս Յովհաննիսեանը` ընդգծելով, որ հոգեւոր առաջնորդների եռակողմ հանդիպումները կարեւոր ձեւաչափ են արցախեան հիմնախնդրի խաղաղ կարգաւորման եւ յետպատերազմեան շրջանում առաջացած մարտահրաւէրները յաղթահարելու գործում: Սրբազան Հայրն անդրադարձ կատարեց եռակողմ հանդիպման ընթացքում Վէահափառ Հայարապետի կողմից բարձրացուած խնդիրներին եւ կարեւորեց Նորին Սրբութեան ներդրած ջանքերը` ուղղուած ռազմագէիների վերադաձին, Արցախի անվտանգութեանը, մշակութային կառոյցների ու սրբավայրերի պահպանութեանը:

Ժողովի օրակարգում ընդգրուած էր նաեւ յետպատերազմեան եւ համաճարակային պայմաններում եկեղեցու առաքելութեան իրագործմանն ուղղուած ծրագրերը: Թեմայի շուրջ զեկոյցնէր ներկայացրեցին Արեւելեան Եւրոպայի Հայրապետական Պատուիրակ, Վատիկանում Ամենայն Հայոց Կաթողիկոսի ներկայացուցիչ Գերաշնորհ Տ. Խաժակ արքեպիսկոպոս Պարսամեանը, Տաւուշի թեմի առաջնորդ Գերաշնորհ Տ. Բագրատ եպիսկոպոս Գալստանեանը, ԱՄՆ Հայոց Արեւելեան թեմի առաջնորդ Գերաշնորհ Տ. Դանիէլ եպիսկոպոս Ֆընտըգեանը: Ժողովականները, քննութեան առնելով յետպատերազմեան եւ համաճարակային իրավիճակում առկայ մարտահրաւէրները, մասնաւորաբար կարեւորեցին սոցիալական ու կրթական ծրագրերի զօրացումը եւ մատաղ սերնդի հոգեւոր դաստիարակութիւնը: Թելադրուեց, որ այս ուղղութեամբ իրականացուող ծրագրերն էլ աւելի ընդգրկուն պէտք է  դարձնել եւ թեմերի ու եկեղեցական համայքների կողմից յատուկ ուշադրութեան արժանացնել:

Քննարկուեցին նաեւ Եկեղեցու կանոնական ու հովուական կեանքին, կարգապահական ու իրաւական հարցերին, կրթական ու սոցիալական ծրագրերին եւ Եկեղեցու առաքելութեան արդիւնաւորմանն առնչուող հարցեր:

ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ