Յունիսի 10-ին Ն․Ս․Օ․Տ․Տ․ Գարեգին Բ Ամենայն Հայոց Կաթողիկոսի գլխաւորութեամբ Մայր Աթոռ Սուրբ Էջմիածնում տեղի ունեցաւ Հայաստանի եպիսկոպոսների խորհրդակցութիւն, որի ընթացքում շօշափուել են մեր հայրենական կեանքի ներկայ իրավիճակին առնչուած հարցեր: Խորհրդակցութեան աւարտին ընդունուել է հետեւեալ յայտարարութիւնը․
«Քննարկելով մեր հայրենիքի ու ժողովրդի առջեւ ծառացած մարտահրաւէրները՝ խորը մտահոգութիւն ենք յայտնում Հայաստանի ներքաղաքական կեանքում, արտահերթ խորհրդարանական ընտրութիւնների այս շրջանում արձանագրուող մի շարք դատապարտելի երեւոյթների առնչութեամբ։
Յունիսի 7-ին մեկնարկած նախընտրական քարոզարշաւի առաջին իսկ օրից տեղ գտած ատելութեան խօսքը, վարկաբեկիչ եւ վիրաւորական արտայայտութիւնները, հայհոյելու, հաշուեյարդարներով ու բռնութեամբ սպառնալու վարքագիծը, ցաւօք, մեր հասարակութեանը կարող է կանգնեցնել այնպիսի կացութեան առջեւ, որի ահագնացման պարագայում անխուսափելի պիտի դառնան անհանդուրժողութեան, ատելութեան եւ թշնամանքի հողի վրայ քաղաքացիական բախումները։ Արդարացում չունեն եւ դատապարտելի են բոլոր այն քայլերը, որոնք պառակտում եւ բեւեռացնում են պատերազմի ցաւերը դեռ չամոքած մեր հասարակութեանը։ Անառարկելի ճշմարտութիւն է՝ չար սերմը երբեք չի կարող բարի պտուղ տալ, եւ ինքն իր մէջ բաժանուած ամէն տուն՝ կանգուն մնալ (հմմտ․ Մատթ․ ԺԲ 25)։
Նժարի վրայ է դրուած հայրենիքի ապագան։ Հարկ է հայրենասիրութիւն, նախանձախնդրութիւն ու հետեւողականութիւն դրսեւորել հայրենիքի շուրջ մեր ժողովրդի միասնական տեսլականի ձեւաւորման գործում, որպէսզի իւրաքանչիւրը պատիւ համարի խոնարհուելը այդ տեսլականի իրագործման լծի ներքոյ։ Դա է նուազագոյն գինը, որ կարող ենք վճարել բոլոր ժամանակների մեր նահատակ զաւակների անձնազոհութեան դիմաց։ Այս գիտակցութիւնը պէտք է գերակայի մեր երկրում եւ ուղիներ հարթի առկայ խնդիրների յաղթահարման։
Այսու կոչ ենք անում բոլոր քաղաքական ուժերին, այդ թւում յատկապէս իշխող կուսակցութեանը, զերծ մնալու անպատշաճ խօսուածքից ու պահուածքից։ Բազմադարեայ հարուստ մշակոյթ եւ բարձր արժէքներ կերտած մեր ժողովրդին անյարիր են այդպիսի դրսեւորումները, որոնք նսեմացնում են մեր ազգային նկարագիրն ու վարկը։ Մի՛ եղէք չարի սերմնացաններ եւ անընդունելի վարքագծով գայթակղութիւն մի՛ դարձէք քրիստոնեայ մեր ժողովրդի համար։
Աղօթում ենք, որ Տէրը Իր Սուրբ Աջի հովանու ներքոյ խաղաղութեան մէջ պահի մեր երկիրը՝ պարգեւելով իմաստութիւն համայն մեր ժողովրդին՝ սիրոյ եւ համերաշխութեան մթնոլորտում արարելու իր վաղուայ օրը»։