Հայաստանում 2021 թ․ յունիսի 20-ին տեղի ունեցած արտահերթ խորհրդարանական ընտրութիւնների առիթով Մայր Աթոռ Սուրբ Էջմիածինը հանդէս է եկել յայտարարութեամբ։
«Աստծոյ ողորմածութեամբ խորհրդարանական ընտրութիւնները, հակառակ նախընտրական լարուածութեանը, սուր հակադրութիւնների եւ արձանագրուած որոշ խախտումների, ունեցան համեմատաբար խաղաղ ընթացք եւ անցան առանց լուրջ միջադէպերի։
Եկեղեցու համար չափազանց կարեւոր է, որ երկրի ղեկավարումն ստանձնող քաղաքական ուժը կարող լինի ապահովելու եւ երաշխաւորելու ազգանպաստ լուծումները կենսական այնպիսի հարցերի, որոնք վերաբերում են Հայաստանի, Արցախի եւ հաւատաւոր մեր ժողովրդի անվտանգութեանը, ազգային ինքնութեան եւ արժեհամակարգի պաշտպանութեանը, կրթութեանը, մշակոյթին, հանրային համերաշխութեանը եւ համազգային ընդգրկում ունեցող այլ խնդիրների։ Մայր Աթոռը եւ մեր Եկեղեցու հոգեւոր ողջ դասը իր դիրքորոշումներն ու մտահոգութիւնները պարբերաբար արտայայտել է նման կարեւորագոյն հարցերի վերաբերեալ եւ այսուհետ եւս հետեւողական է լինելու յիշեալ ոլորտներում պետական, ազգային եւ հոգեւոր առաջնային շահերի պաշտպանութեանը։
Մայր Աթոռ Սուրբ Էջմիածինը դրական է գնահատում հանրահաւաքի ժամանակ վարչապետի պաշտօնակատար Նիկոլ Փաշինեանի երեկ կատարած անդրադարձը համերաշխութեան, միաբանութեան, համազգային ողջ ներուժի համախմբման կարեւորութեանը հայրենիքի անվտանգ, բարօր ու առաջընթաց կեանքի հաստատման գործում, ինչպէս նաեւ՝ քաղաքական դաշտում հայհոյախօսութեանը եւ ատելութեան խօսքին վերջ տալու անհրաժեշտութեանը։ Ողջունելի է նաեւ վարչապետի պաշտօնակատարի կողմից հոգեւոր առաջնորդներին ուղղուած երկխօսութեան առաջարկը։ Մայր Աթոռ Սուրբ Էջմիածինը մշտապէս հանդէս է եկել այս դիրքերից եւ ակնկալում է, որ նոր ձեւաւորուող իշխանութիւնը գործնական եւ հետեւողական քայլեր կը ձեռնարկի Եկեղեցու հետ գործակցութեան իրենց իսկ առաջարկն իրականացնելու, ինչպէս եւ հանրային համերաշխութիւն ձեւաւորելու ուղղութեամբ։
Հոգեւոր դասը՝ գիտակից իր հոգեւոր առաքելութեանը եւ դրա կարեւորութեանը յատկապէս նման ճգնաժամային իրավիճակներում, պիտի շարունակի անել ամէն անհրաժեշտը, որպէսզի մեր ժողովուրդը կարող լինի յաղթահարելու իր կեանքի դժուարութիւններն ու մարտահրաւէրները, որպէսզի հայրենիքի անկախացեալ այս փոքրիկ նշխարն ուժ գտնի իր մէջ վերականգնելու իր անվտանգութիւնն ու ամրութիւնը՝ շարունակելու ուղին դէպի նոր հարիւրամեակներ։
Հայցում ենք Ամենակալ Աստծոյ օրհնութիւնն ու զօրակցութիւնը մեր երկրին եւ մեր հաւատաւոր ժողովրդին։ Աստուած թող պահի ու պահպանի Հայաստան եւ Արցախ հայրենի մեր երկիրը խաղաղութեան եւ բարօրութեան մէջ»։