Մայր Աթոռ Սուրբ Էջմիածնում Կատարուեց Կրթութեան Մշակների Օրհնութեան Կարգ

Օգոստոսի 30-ին` 2021-2022 թթ. ուսումնական նոր տարեշրջանին ընդառաջ, Մայր Աթոռ Սուրբ Էջմիածնի Սուրբ Տրդատ բաց խորանին, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ կրթութեան մշակների օրհնութեան աւանդական կարգը:  

Մայր Աթոռ Սուրբ Էջմիածնի Քրիստոնէական դաստիարակութեան կենտրոնի կողմից կազմակերպուած արարողութեանը ներկայ էին ՀՀ կրթութեան տեսչական մարմնի ղեկավար տիար Ալեքսանդր Շագաֆեանը, մարզային կրթութեան վարչութիւնների ղեկավարներ, բարձրագոյն ուսումնական հաստատութիւնների ռեկտորներ, ՀՀ Զու  ռազմակրթական համալսարանների պետեր, Երեւանի եւ մարզերի հանրակրթական դպրոցների տնօրէններ եւ բազմաթիւ մանկավարժներ:

Oրհնութեան կարգի աւարտին Ամենայն Հայոց Կաթողիկոսն իր հայրապետական օրհնութիւնն ու գնահատանքը փոխանցեց կրթութեան ոլորտի երախտաւորներին:

Վերջում ի պատիւ հրաւիրեալների՝ տեղի ունեցաւ ընդունելութիւն:

Ն.Ս.Օ.Տ.Տ. ԳԱՐԵԳԻՆ ԵՐԿՐՈՐԴ

ԾԱՅՐԱԳՈՅՆ ՊԱՏՐԻԱՐՔ ԵՒ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ ԿՐԹՈՒԹԵԱՆ ՄՇԱԿՆԵՐԻ ՕՐՀՆՈՒԹԵԱՆ ԱՐԱՐՈՂՈՒԹԵԱՆԸ

Պատուարժան ռեկտորներ, կրթութեան գործի պատասխանատուներ եւ սիրելի մանկավարժներ, 

Ուրախ ենք վերստին ողջունելու ձեզ Մայր Աթոռ Սուրբ Էջմիածնում։ Բերում ենք ձեզ Հայրապետական Մեր օրհնութիւնն ու գնահատանքը։ Մենք մեծապէս կարեւորում ենք, որ կրթութեան գործին նուիրուած մշակներդ նոր ուսումնական տարուայ մեկնարկին ուխտաւորաբար այցելում էք Մայր Աթոռ Սուրբ Էջմիածին, որպէսզի Աստծոյ օրհնութեամբ սկսէք ձեր շնորհընկալ առաքելութիւնը։

Ձեր հոգածութեան եւ հայեացքի ներքոյ են ուսում առնում եւ կրթւում մեր ժողովրդի  զաւակները՝ մեր երկրի ապագայ քաղաքացիները։ Արդարեւ, մեծ պատասխանատուութիւն եւ մեծ պատիւ է մանկավարժ լինելը, քանզի իւրաքանչիւր ազգի յուսալի ապագան պայմանաւորում են ուսումը, կրթութիւնն ու դաստիարակութիւնը։ Յատկապէս արդի ժամանակներում, բազմակողմ ու արագընթաց դարձած մեր կեանքի բոլոր ոլորտներում առաւել ենք զգում այդ իրողութիւնը։ Գլոբալիզացիայի համահարթեցնող ընթացքների եւ օրէցօր նորացող գիտական ձեռքբերումների յանդիման՝ այսօր արդիական գիտելիքի ուսուցմանը հաւասարազօր կարեւորւում է հոգեւոր նկարագրի  ու ներաշխարհի ձեւաւորումը։

Սիրելիներ, մեր հայրենիքի կեանքում տեղ գտած վերջին զարգացումները, արցախեան պատերազմը, հայրենիքի ներկայիս ծանր ու անկայուն վիճակը վկայում են, թէ որքան մեծ տեղ պէտք է տրուի կրթութեանը եւ մրցունակ գիտելիքին մեր կեանքում։ Մեր կրած փորձութիւնը եւ շարունակուող դժուարութիւնները առաւել շեշտադրում են նաեւ ճշմարիտ արժէքներով կերտուած աշխարհայեացքի, վեհ իտէալների ու ձգտումների կարեւորութիւնն ու պահանջը, որոնք  նախ եւ առաջ սերմանւում, աճում ու զարգանում են կրթօջախներում եւ ընտանիքում։ Կրթութիւնը ամենահզօր զէնքն է։ Դարերի ընթացքում մեր ժողովուրդը մաքառել ու գոյատեւել է եւ իր կեանքը կերտել ու վերակերտել է ամբարած գիտելիքի, ճանաչողութեան ու հմտութիւնների շնորհիւ։ Այսօր նոյնպէս հայրենիքի անվտանգութիւնն ու ապահովութիւնը պէտք է խարսխուած լինեն մեր երիտասարդների ձեռք բերած գիտելիքների, ինքնաճանաչողութեան, հայրենասիրութեան ու ազգասիրութեան վրայ։

Մատուցուող գիտելիքը եւ կրթութիւնը ամրօրէն հաստատուած պիտի լինեն ազգային-աւանդական արժեհամակարգի վրայ։ Մեր խնդիրը այսպէս կոչուած՝ աշխարհաքաղաքացի պատրաստելը չէ, այլ  հայրենասէր, բարոյական բարձր յատկանիշներով օժտուած, ազգային դիմագիծ ունեցող, ուսեալ, բարեկիրթ անձ եւ նախանձախնդիր քաղաքացի։ Այս առումով կարեւորում ենք ամբողջական ծրագրով «Հայ Եկեղեցու պատմութեան» պարտադիր դասաւանդումը դպրոցում։ Այսօր իւրաքանչիւրս մեր տեղում պէտք է հոգ տանենք, որպէսզի կրթութեան ոլորտում նախաձեռնուած բարեփոխումները, որոնց շուրջ առիթ ունեցել ենք արտայայտուելու, չվնասեն, այլ իրապէս օգտակարութիւն ունենան մեր մատաղ սերնդի կրթութեան գործում։ Այս ամէնում կարեւոր է ձեր նախանձախնդրութիւնը՝ ապահովագրելու մեր մանուկներին եւ պատանիներին անցանկալի երեւոյթներից ու մոլորութիւններից, զօրացնելու նրանց հոգում ազգային ինքնագիտակցութեան ոգին եւ այն համոզումը, որ գիտելիքը լոյս է եւ աղբիւր բարիքների։

Կրթութեան մշակներիդ օրհնութեան այս նուիրական օրը առանձնայատուկ ցանկանում ենք արձանագրել, որ հայրենեաց սահմանների պաշտպանութեան ծառայութեան մէջ այսօր դրսեւորուող ոգին պտուղն ու արգասիքն են նաեւ ձեր ներդրած ջանքերի։ Սիրելիներ, առաջնորդուէք եւ առաջնորդէք ձեր սաներին առ Աստուած հաւատքով ու ապաւինութեամբ, եւ կենսունակ պիտի լինեն ձեր սերմանած արժէքները ու մեր ժողովուրդը պիտի պահպանի վերելքի ներուժը՝ սաղմոսերգուի խօսքի համաձայն, որ պատգամում է «պահիր Տիրոջ ճանապարհները եւ Նա կը բարձրացնի քեզ երկիրը ժառանգելու» (Սղմ. ԼԶ 34)։

Մեր Եկեղեցին, ինչպէս բոլոր ժամանակներում, շարունակելու է աջակցել մեր երկրում կրթութեան ու գիտութեան զարգացմանը։ Շարունակելու ենք համագործակցել նախարարութեան եւ կրթօջախների հետ՝ ապագայի բարի յոյսերով ու հաւատով։

Վերստին Մեր գնահատանքն ենք բերում ձեզ` կրթութեան մշակներիդ  ձեր բարձր յանձնառութեան, ձեր անխոնջ ջանքերի ու անսպառ նուիրումի համար։ Առ Աստուած աղօթքով հայցում ենք,  որ Երկնաւոր Տէրը խաղաղ պահի մեր հայրենիքը եւ մեր ժողովրդին ի սփիւռս աշխարհի, օրհնի մանկավարժներիդ աշխատանքը բարի արգասիքներով եւ բազմապատկի ձեր ուժն ու եռանդը եւ բարի վաստակը մեր հայրենիքի եւ ժողովրդի կեանքում։

Շնորհ, սէր եւ ողորմութիւն Տեառն մերոյ Յիսուսի Քրիստոսի եղիցին ընդ ձեզ և ընդ ամենեսեան. ամեն։