Ն. Ս. Օ. Տ. Տ. Գարեգին Բ Ամենայն Հայոց Կաթողիկոսի Շնորհաւորական Ուղերձը
Գիտելիքի, Գրի Եւ Դպրութեան Օրուայ Առիթով
(1 Սեպտեմբերի, 2022 Թ․)
Գիտելիքի, գրի եւ դպրութեան օրուայ առիթով Մայր Աթոռ Սուրբ Էջմիածնից Հայրապետական սիրով Մեր օրհնութիւնն ենք բերում եւ շնորհաւորում բոլոր կրթօջախների սաներին ու մանկավարժներին, կրթութեան գործում ներգրաւուած բոլոր պատասխանատուներին:
Սիրելիներ, սկսւում է եւս մէկ ուսումնական տարի` գիտելիքների ամբարման ու արժէքների ճանաչման, հոգեւոր ու մտաւոր հասունացման, նոր ձգտումների ու ջանադրութեան ժամանակամիջոց, որը նախաշաւիղն է մեր երկրի զարգացման ու առաջադիմութեան: Արդարեւ, իր լուսաւոր ապագային նայող ամէն ժողովրդի եւ հասարակութեան համար ուսումն ու կրթութիւնը առաջնահերթ նպատակներ են: Այդպէս է դարերով ընկալել նաեւ մեր ժողովուրդը` նեղութիւններով լի ժամանակներում անգամ վառ պահելով իմացութեան ու կրթութեան ջահը: Այս համոզումը առաւել պիտի առաջնորդի մեզ այսօր, երբ մեր կեանքը խռովուած է պատերազմի ծանր հետեւանքներով, երբ աշխարհն ալեկոծւում է իրարամերժ ընթացքներով: Ներկայ մարտահրաւէրների առջեւ առաւել քան անհրաժեշտ է արդիական կրթութեան ապահովումը` խարսխուած ազգային եւ հոգեւոր մեր արժէքների վրայ, որպէսզի մեր զաւակները հարազատ մնան իրենց ինքնութեանը եւ աստուածային պատգամների կենսագործմամբ կառուցեն իրենց կեանքն ու ապագան մեր հայրենիքի: «Տունը շինւում է իմաստութեամբ եւ հաստատւում խոհեմութեամբ, եւ գիտութեամբ շտեմարանները լցւում են ամենայն հարստութեամբ ու պատուական բարիքներով» (Առակ․24․ 3-4):
Մեր աղօթքն ու մաղթանքն է, որ Աստուած լուսաւոր պահի մեր կրթօջախները, օրհնի մանկավարժներիդ աշխատանքը` կրթելու մեր ժողովրդի արժանաւոր զաւակներ եւ պարգեւի ձեզ ուժ ու եռանդ ձեր նուիրական առաքելութեան մէջ: Սիրելի սաներ, զօրացէք ջանասիրութեամբ, քաջարթուն մտքով ու հոգով եւ ձեր ուսուցիչների առաջնորդութեամբ ու միասնական ջանքերով ուսումնական տարին առատ դարձրէք արդիւնքներով, որոնք պիտի լուսաւորէն ձեզանից իւրաքանչիւրի եւ մեր ողջ ժողովրդի ճանապարհը ու ծառայեն աստուածապարգեւ մեր հայրենիքի զօրացմանն ու առաջընթացին:
Թող Աստուած Իր Ամենախնամ հովանու ներքոյ խաղաղութեան մէջ առատապէս օրհնի ու հանապազ պահպանի մեր հայրենիքն ու ժողովրդին:
###
Օրհնութեամբ`