Հայաստանի Հանրապետութեան Նախագահ Սերժ Սարգսեան նոր նշանակումներ կատարած է։ Այս մասին կը յայտնեն ՀՀ Նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն: Նախագահի հրամանագրով Աշոտ Մանուկեան նշանակուած է Հայաստանի Հանրապետութեան ջերմուժի եւ բնական պաշարներու նախարար:
Այլ հրամանագրով մը Իգնատի Առաքելեանը նշանակուած է Հայաստանի Հանրապետութեան գիւղատնտեսութեան նախարար:
Վահան Մարտիրոսեան նշանակուած է Հայաստանի Հանրապետութեան փոխադրութեան եւ կապի նախարար, Դաւիթ Յարութիւնեան՝ Հայաստանի Հանրապետութեան կառավարութեան աշխատակազմի ղեկավար-նախարար:
Նախագահի մէկ այլ հրամանագրով Վարդան Արամեան ազատուած է Հայաստանի Հանրապետութեան Նախագահի աշխատակազմի ղեկավարի առաջին տեղակալի պաշտօնէն եւ նշանակուած Հայաստանի Հանրապետութեան ելեւմուտքի նախարար:
Վաչէ Գաբրիէլեանը նշանակուած է Հայաստանի Հանրապետութեան միջազգային տնտեսական ընդելուզման եւ բարեփոխումներու նախարար, փոխվարչապետ։
Ալեքսան Յարութիւնյանը Նախագահի հրամանագրով ազատուած է Արժանթինի, Արեւելեան Ուրուկուէյի, Փերուի եւ Չիլիի հանրապետութիւններու մէջ ՀՀ արտակարգ եւ լիազօր դեսպանի պաշտօնէն եւ նշանակուած Հայաստանի Հանրապետութեան Նախագահի աշխատակազմի ղեկավարի առաջին տեղակալ: