Գոհունակութեամբ կը հաղորդենք որ այս տարուան սկիզբէն Թէքէեան Մշակութային Միութեան Միացեալ Նահանգներու եւ Գանատայի Կեդրոնական Վարչութիւնը Գալիֆորնիոյ հայահոծ գաղութէն ներս վարիչ քարտուղարի պաշտօնին կոչած է Տիկին Մայտա Քիւրեճեանը, որ երիտասարդ տարիքէն սկսեալ բոլորանուէր մասնակցութիւն բերած է մեր կազմակերպութիւններէն՝ ՌԱԿի, ԹՄՄի եւ ՀԲԸՄի կեանքէն ներս, վարելով կարեւոր պաշտօններ: Շրջան մը իր աշխատակցութիւնը բերած է Պէյրութի «Զարթօնք» օրաթերթին:
Տիկին Մ. Քիւրեճեան շրջանաւարտ է Պէյրութի Հայկազեան Համալսարանէն ուրկէ 1982ին ստացած է պսակաւոր արուեստից երկու կոչումներ՝առեւտրական եւ քաղաքական գիտութիւններու մէջ:
1980ին փոխադրուելով Պոստոն. շրջան մը ստանձնած է ԹՄՄի վարիչ քարտուղարի պաշտօնը եւ ապա՝ ՀԲԸՄի քարտուղարութեան պաշտօնը Նիւ Ինկլընտի շրջանակին համար մինչեւ 1990 թուականը եւ այնուհետեւ հիմնած է իր անձնական առեւտրական հաստատութիւնը մինչեւ իր վերադարձը Պէյրութ, ուր կազմած է իր ընտանեկան բոյնը:
Պէյրութի մէջ ան պաշտօնավարած է Հայկազեան Համալսարանէն ներս. 2014-2015ին եղած է վարիչը համալսարանի 60րդ տարեդարձի յանձնախումբին: Լիբանանի մէջ ան շարունակած է բերել իր ծառայութիւնները մեր կազմակերպութիւններէն ներս մանաւա՛նդ սկաուտական շարժումի մէջ:
Իր այս նոր պատասխանատու պաշտօնով վստահաբար Տիկին Մ. Քիւրեճեան պիտի ունենայ բեղմնաւոր գործունէութիւն աշխուժացնելով արդէն իսկ գործող մեր երեք մասնաճիւղերը:
ԹԷՔԷԵԱՆ ՄՇԱԿՈՒԹԱՅԻՆ ՄԻՈՒԹԵԱՆ
ԿԵԴՐՈՆԱԿԱՆ ԳՐԱՍԵՆԵԱԿ