Աննախադէպ իրականութեան դէմ յանդիման ենք կանգնած, արդէն շուրջ երկու ամիս է աշխարհը ահազանգային տագնապի մէջ է, այս աննախընթաց համաճարակը (Covid 19), փակել է դուռ ու դարբաս ընտանիքներին բանտարկելով տներում: Մանրադիտակով հազիւ տեսանելի այս միքրովայրըսը աշխարհի բնական կեանքը ալեկոծել, խուճապ ու տագնապ է առաջացրել՝ մեկուսացում, ինքնազսպում խրախճանքներից, հանդիսութիւններից եւ շփում հանդիպումներից: Անցեալում պանդեմաններ եղել են մարդկային զոհեր խլելով, բայց ոչ սրա յանգոյնը, այս մէկը տարբեր է իր տարողութեամբ եւ տարածուելու ուժգնութեամբ, այնպէս որ աշխարհը լուրջ հետամուտ է զայն չէզոքացնել, քանզի անուշադրութիւնը մեծ աղէտների հետեւանք կ’ունենայ, ինչպէս արդէն բաւական մեծ թուով մարդիկ են զոհուել: Աշխարհի կարգ ու սարքը խառնուել եւ սահմանները փակուել են: Աշխարհի երկրներից մէկն էլ մեր պաշտելի հայրենիքն է եւ այն բոլոր երկրները ուր ապրում են մեր քոյր ու եղբայրները անվերապահ նկատառումներով պայքարում են այս մարդակեր եւ անտես հրէշի դէմ: Անշուշտ պէտք չէ վհատել մեր աշուղ Ջիվանի հանճարեղ խօսքով՝ սա էլ կը գայ ու կ՛երթայ, այն ինչ կարեւոր է առողջապահութեան նուիրեալների խորհուրդներին ու յորդորներին ունկնդիր՝ խաղաղ հոգով ու սրտով, առանց խուճապի մատնուելով շարունակենք մեր կեանքը զսպուածութեամբ մինչեւ աներեւոյթ սադայէլի վերջը տրուի:
Այս պայմաններում, եկող ապրիլեան օրերին ընդառաջ ենք գնալու եւ տօնելու սրբ. Զատիկը եւ ոգեկոչելու մեր Բիւրաւոր Նահատակների յիշատակը: Անտարակոյս կը նշենք տօնը զգուշաւորութեամբ մեր բնակարաներից ներս եւ կ’ոգեկոչենք մեր ազգի ցեղասպանութեան մէկ ու կէս միլիոնից աւելի մեր անմեղ զոհերի սրբ. յիշատակը հաստատակամ մեր պահանջատիրութեան պայքարի մէջ մեր ձայնը լսելի դարձնելով լրատուական ցանցերով եւ հեռուստաալիքներով:
Գալով մեր զատկական տօնին, ինչպէս գիտենք Յիսուս –Քրիստոսի Հրաշափառ Յարութեան տօնն է, որին մենք հայերս սրբ. Զատիկ ենք կոչում, որը նշանակում է՝ ազատում, անցում, փրկութիւն… քրիստոնեայ աշխարհը մեծ ուրախութեամբ է տօնում Յիսուսի Յարութիւնը, որն է՝ յաղթանակ մահուան դէմ: Սրբ. Զատիկը մեր կրօնական մեծ տօներից է, գարնան եղանակին զուգընթաց, երբ ձմեռը հալուող ձիւնների պէս քաշւում է դէպի սպիտակափառ փայլատակող գագաթները գարուն է գալիս, նոր կեանք, ընձիւղուած բնութիւն՝ կանաչութեամբ ծաղկածիծաղ զգեստով: Սրբ. Զատիկը ժողովրդականացած եւ սիրուած տօներից է՝ խրախճանքներով եւ իւրայատուկ սովորութիւններով, ինչպէս՝ ձու ներկելը, ձուախաղը եւ այլ աւանդութիւններ:
Այս տօնը մեզ խորհել է տալիս, որ այս թագաժահրախտն (Corona Virus) էլ աշխարհի գիտնականների միջոցով պատուաստը կը յայտնաբերուի եւ վերջ կը տրուի մտավախութիւններին, բոլորիս ակնկալիքն է շուտափոյթ կասեցում, որպէսզի մարդկութիւնը ձեռբազատուի այս մահաբեր համաճարակից:
Այդ առումով մտահոգութիւնները զգալի են, սակայն կեանքը շարունակւում է բարու եւ սիրոյ ցանկութիւններով: