Խոր ցաւով կը տեղեկացնենք, որ Օգոստոսի 28-ին՝ 67 տարեկան հասակին, ի Տէր ննջեց Հայաստանեայց Առաքելական Սուրբ Եկեղեցուոյ նուիրեալ սպասաւոր, Արժանապատիւ Տ. Ասողիկ աւագ քահանայ Ժամկոչեանը:
Արժանապատիւ Տէր հայրը երկար տարիներ հոգևոր ծառայութիւն մատուցած է Սուրիոյ, Յունաստանի և Ամերիկայի Միացեալ Նահանգներու Արևմտեան Թեմի եկեղեցիներուն մէջ։
Ծնած է Հալէպ, Հոկտ. 27, 1953ին. Աւազանի անունով Անդրանիկ։
Նախնական ուսումը ստացած է տեղւոյն Ազգային Մեսրոպեան վարժարանին մէջ:
1972ին ընդունուած է Մեծի Տանն Կիլիկիոյ Կաթողիկոսութեան Դպրեվանքը, որպէս քահանայից դասարանի ուսանող, որու երկամեայ շրջանը աւարտած է 1974ին։ Նոյն տարին վարած է Ազգ. Նուպարեան Վարժարանի Տնօրէնի պաշտօնը։ 1987 Նոյեմբեր 29ին քահանայ ձեռնադրուած է Հալէպի Սբ. Աստուածածին Հայց. Առաքելական եկեղեցւոյ մէջ ձեռամբ այդ օրերու Բերիոյ Թեմի Առաջնորդ՝ Գերշ. Տ. Սուրէն Արք. Գաթարոյեանի։ 1994-1995-ի շրջանին դասաւանդած է Հալէպի Կրթասիրաց Վարժարան որպէս Կրօնի ուսուցիչ:
Տասը տարի նոյն եկեղեցւոյ մէջ ծառայելէ ետք անցած է Աթէնք, Յունաստան ուր ծառայած է մինչեւ 2001 Նէոս Քոզմոսի Սբ. Կարապետ եկեղեցւոյ մէջ:
2001-ին անցած է Ամերիկայի Միացեալ Նահանգներ, հաստատուելով Լոս Անճելըսի մէջ, եղած է բազում եկեղեցիներու այցելու հովիւը։
2006-ին նշանակուած է Սաքրամենթօյի Սբ. Յակոբ Հայց. Առաքելական եկեղեցուոյ հոգևոր հովիւ ուր ծառայած է մինչեւ 2015։
2015-2021 վերադարձած է Լոս Անճելըս միանալով իր ընտանիքին և շարունակելով իր քահանայական ծառայութիւնը մինչև իր մահը։
Յիշատակն արդարոյն օրհնութեամբ եղիցի։
Նորոգ հանգուցեալ Տէր Ասողիկ Քհնյ. Ժամկոչեանի Տան կարգը տեղի պիտի ունենայ Երկուշաբթի, Սեպտեմբեր 13, 2021-ին առաւօտեան ժամը 10։00-ին, Հայց. Առաքելական եկեղեցւոյ Արեւմտեան Թեմի Մայր Տաճարին մէջ, Տան կարգը պիտի կատարէ Թեմիս բարեջան Առաջնորդ Գերշ. Տ. Յովնան Արք. Տէրտէրեան, որուն պիտի յաջորդէ թաղման կարգը, որ տեղի պիտի ունենայ Hollywood Hills-ի Forest Lawn գերեզմանատան մէջ կ.ե. ժամը 12։30-ին։