Սեպտեմբերի 21-ին, Հայաստանի Հանրապետութեան Անկախութեան տօնի առիթով, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, Սուրբ Գայանե վանքում կատարուեց Հանրապետական մաղթանքի արարողութիւն։
Հոգեւորականաց դասն ու ներկայ ժողովուրդը միասնական աղօթք բարձրացրեցին առ Աստուած հայրենիքի անսասանութեան, խաղաղ եւ անվտանգ կեանքի համար:
Մայր Աթոռ Սուրբ Էջմիածնի միաբանների մասնակցութեամբ կատարուած մաղթանքի աւարտին Ամենայն Հայոց Կաթողիկոսն հայրապետական իր ուղերձը յղեց համայն հայ ժողովրդին։
«Սիրելի ժողովուրդ ի Հայաստան, Արցախ եւ ի սփիւռս,
Այս տարի լրանում է մեր անկախ պետականութեան վերահաստատման երեսուն ամեակը։ Երեք տասնամեակ առաջ մեր ժողովուրդը միաբան կամքով, համախումբ եւ միասնական ընտրեց անկախութեան վերակերտման ճանապարհը՝ խանդավառութեամբ եւ ոգեշնչումով իրագործելու իր դարաւոր իղձն ու երազանքը։ Պետականաշինութեան, հայրենակերտումի դժուարին ուղի անցաւ մեր ժողովուրդը, դիմագրաւեց բազում մարտահրաւէրներ, յանձն առաւ մեծ զոհողութիւններ։ Պանծալի յաղթանակների, յաջողութիւնների ու ձեռքբերումների հետ ունեցանք նաեւ բացթողումներ, սխալ ընթացքներ եւ՛ հայրենական անդաստանում, եւ՛ միջազգային հարթակներում։
Անցեալ տարի ազգովի ենթարկուեցինք նոր փորձութեան։ Ադրբեջանը վերստին պատերազմ սանձազերծեց Արցախի Հանրապետութեան դէմ։ Աղէտալի պատերազմի ծանրագոյն հետեւանքները եւ ամէն օր նորովի արնահոսող վէրքերը բոլորովին նոր իրավիճակ են ստեղծել մեր ժողովրդի կեանքում։ Մեր սրտերում մեր կորուստների, մեր զոհուած նահատակների, գերեալների ու անյայտ կորածների խորը ցաւն է, ապագայի անորոշութեան անհանգստութիւնը, բայց նաեւ՝ վճռականութիւնը վերստին ոտքի կանգնելու, թօթափելու մեզ պատուհասած արհաւիրքներն ու նեղութիւնները եւ ապահովելու պայմաններ, որ մեր ժողովուրդը Արցախում ու Հայաստանում ապրի անվտանգ ու բարօր։
Հայրենի երկրի անկախութիւնը մեծագոյն արժէք է։ Հայոց Եկեղեցին դարերի ընթացքին մշտապէս արթուն է պահել անկախութեան գաղափարը մեր զաւակների հոգիներում, օրհնել մեր ազատութեան մաքառումները, կարելին ի սպաս դրել մերօրեայ անկախ հայրենիքի կայացմանն ու առաջընթացին եւ շարունակելու է իր առաքելութիւնը այս սուրբ գործում։
Անկախութեան 30-ամեակի գլխաւոր խորհուրդը առաջադէմ, բարօր, սիրոյ ու միաբանութեան մէջ ծաղկող երկիր վերակերտելն է։ Այսօր, ցաւօք, յաճախ ենք տեսնում անհանդուրժողականութեան դրսեւորում՝ համերաշխութեան ու երկխօսութեան փոխարէն։ Մեր երկրի ու ժողովրդի առջեւ ծառացած հիմնախնդիրները պահանջում են միասնականութիւն, ջանքերի մէկտեղում եւ համախոհ նպատակադրումների իրականացում։ Թանկ գնով ձեռք բերուած անկախութիւնը համազգային միասնականութեամբ պիտի պաշտպանենք ու պահպանենք՝ յաղթահարելով ներքին ու արտաքին մարտահրաւէրները այս սրբազան առաքելութեան ճանապարհին, քանզի մեր անկախ պետութիւնը մեր գոյութեան ու լինելիութեան կարեւորագոյն խարիսխն ու գրաւականն է։
Անկախութեան տօնի առիթով Հայրապետական Մեր օրհնութիւնն ենք բերում համայն մեր ժողովրդին եւ յորդորը՝ ամուր մնալու հաւատքի մէջ, ընթանալու Աստծոյ պատգամներով, համախմբուած հայրենիքի շուրջ, հայրենեաց սիրով ու եղբայրութեամբ իրականացման առաջնորդելու ազգային մեր լուսաւոր իղձերը։
Աղօթք ենք վերառաքում առ Երկնաւոր Տէրը, որ խաղաղութիւն շնորհի աշխարհին, մեր հայրենիքին, ստեղծագործ ու անվտանգ կեանք՝ ազգիս զաւակներին, այսօր եւ միշտ. ամէն»,- ասաց Ամենայն Հայոց Հայրապետը։