Բեգլարեան՝ Արցախի Հանրապետութեան պետական նախարարը, պիտի ըլլայ գլխաւոր բանախօսը հանրային ձեռնարկի մը, կազմակերպութեամբ Արեւմտեան Միացեալ Նահանգներու Համահայկական խորհուրդին (ԱՄՆՀԽ): Ձեռնարկը տեղի պիտի ունենայ Երկուշաբթի, 25 Հոկտեմբերին, երեկոյեան ժամը 7-էն սկսեալ, Իրանահայ միութեան սրահին մէջ, Կլենտէյլ:
Բեգլարեան, որ 2018-2020 ծառայած է իբրեւ Արցախի մարդու իրաւունքներու պաշտպան՝ պիտի զեկուցէ Արցախի ներկայ վիճակին եւ յետագայ հաւանական զարգացումներուն մասին, ներառեալ՝ կառավարական ծրագիրներ, բնակչութեան վերաբնակեցում եւ տնտեսական զարգացում:
Իբրեւ Արցախի մարդկային իրաւունքներու պաշտպան՝ Բեգլարեան կարեւոր դեր ունեցաւ 2020ի 44օրեայ պատերազմի մասին կարեւոր տեղեկագիրներ պատրաստելու գործին մէջ:
Պատերազմէն առաջ, ան ուսումնասիրած էր Արցախի ժողովուրդի սահմանադրական իրաւունքները եւ ազատութիւնը ու կատարած բարեկարգումի համապատասխան առաջարկներ: Ան նաեւ զբաղեցուցած է զանազան այլ պետական բարձրաստիճան պաշտօններ, ինչպէս նաեւ դասախօսած է քաղաքական գիտութիւններու առարկաներ Արցախի պետական համալսարանին մէջ:
Դպրոցական տարիներուն, Բեգլարեան ամառները անցուցած է Ամերիկայի Հայ Աւետարանչական ընկերակցութեան Ստեփանակերտի ճամբարին մէջ, ուր իր ստացած քրիստոնէական դաստիարակութիւնը եղած է հիմնաքարը հանրային ծառայութեան իր նուիրումին: Բեգլարեան իր բարձրագոյն ուսումը ստացած է զանազան համալսարաններու մէջ, որոնցմէ գլխաւորներէն եղած են՝ University College of London եւ Fletcher School of Law and Diplomacy, Tufts University (Պոսթըն), մասնագիտանալով քաղաքական գիտութիւններու, դիւանագիտութեան եւ միջազգային յարաբերութիւններու մէջ:
Արեւմտեան Միացեալ Նահանգներու Համահայկական Խորհուրդը հիմնուած է 2019ին, Քալիֆորնիոյ Պըրպենք քաղաքին մէջ, մէկտեղումովը շրջանի հայկական գլխաւոր կազմակերպութիւններուն:
Ներկայիս ԱՄՆՀԽ կը բաղկանայ 25 կազմակերպութիւններէ եւ հաստատութիւններէ: Անոր նպատակն է հայ համայնքի ընդհանրական շահերը պաշտպանել:
«Մենք պատիւ կը զգանք կազմակերպելու այս կարեւոր միջոցառումը, ուր մեր յարգելի հիւրը՝ պրն. Բեգլարեան, պիտի զեկուցէ եւ տեղեկութիւններ տայ Արցախի մեր քոյրերուն եւ եղբայրներուն մասին: Սիրով կը հրաւիրենք բոլորդ», կ՛ըսէ ԱՄՆՀԽ-ի այժմու ատենապետուհի Լենա Պօզոյեան:
Մուտքը ազատ է: Սրահի հասցէն է՝ The Armenian Society of Los Angeles (Iranahye) Center, 117 S. Louise Street, Glendale, CA 91205.