Ամենայն Հայոց Կաթողիկոսն Ընդունեց ՀՀ Դատաւորների Միութեան Անդամներին
Մարտի 27-ին ՀՀ Դատաւորների միութեան անդամներն ուխտաւորաբար այցելեցին Մայր Աթոռ Սուրբ Էջմիածին` Սուրբ Գայիանէ վանքում մասնակցելու Մեծ Պահքի Դատաւորի կիրակիի Սուրբ Պատարագի արարողութեանը:
Յաւարտ Սուրբ Պատարագի` Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Վեհարանում ընդունեց միութեան անդամներին` գլխաւորութեամբ միութեան նախագահ Ալեքսանդր Ազարեանի:
Պարոն Ազարեանը, հայցելով Ամենայն Հայոց Կաթողիկոսի օրհնութիւնը, նշեց, որ ՀՀ դատաւորների միութեան անդամներով համախումբ Դատաւորի կիրակիին առաջին անգամն են ուխտաւորաբար այցելում Մայր Աթոռ Սուրբ Էջմիածին: Միութեան նախագահը նաեւ յոյս հատնեց, որ իրենց այս ուխտագնացութիւնը կը դառնայ գեղեցիկ աւանդոյթ:
Հանդիպմանը Վեհափառ Հայրապետն իր բարեմաղթանքները փոխանցեց ներկաներին եւ, անդրադառնալով օրուայ խորհրդին, նկատեց, որ դատաւորի առաքելութիւնը պէտք է ուղեկցուի Աստծոյ նկատմամբ երկիւղով եւ մարդկանց հանդէպ բարձր պատասխանատուութեամբ: Այս առիթով Նորին Սրբութիւնը յոյս յայտնեց, որ դատաւորներն իրենց ծառայութեան համար ուղենիշ կը դարձնեն աւետարանական այն ճշմարտութիւնը, թէ օրէնքն է մարդու համար եւ ոչ թէ մարդը` օրէնքի:
Վերջում Ամենայն Հայոց Կաթողիկոսը պատասխանեց նաեւ դատաւորների հարցերին, որոնք վերաբերում էին ՀՀ Դատաւորների միութեան եւ Մայր Աթոռի յետագայ գործակցութեան հեռանկարներին, Հայաստանում ու Արցախում առկայ մարտահրաւէրներին: