Անցնող 48 ժամերէն սկսեալ, վերաբացուած են դէպի Հալէպ տանող ցամաքային հիմնական ճանապարհները: «Արեւելք»ի հաղորդմամբ, սկսած է գործել «Քասթէլլո» շրջանի ճանապարհը, մինչ Դամասկոսը Հալէպի կապող «Խանասէր» ճանապարհը, որ բաց էր սակայն ապահովական պատճառներով դարձած էր ամայի, սկսած է բնականոն հունի մէջ մտնել: Աղբիւրը նաեւ կը նշէ, որ Հալէպէն ժամանակաւորապէս Լաթաքիա մեկնած հալէպահայեր մտադիր են յառաջիկայ օրերուն Հալէպ վերադառնալ: Ինչ կը վերաբերի զինուորական ընդհանուր իրավիճակին, ըստ «Ալ Մայատին» կայանին, Սուրիոյ բանակը յաջողած վերադառնալ նախաձեռնողի իր դիրքերուն եւ հարուածել ընդդիմադիր զինեալներու դիրքերը: Կը հաղորդուի նաեւ, թէ ընդդիմադիր զինեալներու «Ալ Զահրա» շրջանին մէջ կատարած գրոհը մատնուած է ձախողութեան եւ վերոնշեալ շրջանին մէջ ընդդիմադիրները կրած են մարդկային ծանր կորուստներ (ըստ կարգ մը աղբիւրներու ընդդիմադիր 40 զինեալներ սպաննուած են այդ շրջանին մէջ): Ինչ կը վերաբերի Հալէպի մէջ սնունդի եւ վառելանիւթի տագնապներուն, կարելի է ըսել, որ այդ տագնապները առաջուայ սրութիւնը չունին եւ քաղաքի բնակիչներ դիւրութեամբ ուտելիք եւ վառելանիւթ կրնան ճարել:
Երկուշաբթի, Դեկտեմբեր 30, 2024
Շաբաթաթերթ
ՄԵՐ ՄԱՍԻՆ
Ռամկավար Ազատական Կուսակցութեան Արեւմտեան Ամերիկայի Պաշտօնաթերթ
ՀԵՏԵՒԵՔ ՄԵԶ
© 2021-2024 Noror.org. All rights reserved. Developed by Abstract.