Հանրայայտ երգչուհի Շերը (Շերիլին Սարգսեան) ողջունելով Հայոց ցեղասպանութեան նուիրուած «Խոստումը» (The Promise) ֆիլմը, իր Twitter-ի էջին գրած է :
«Երկար սպասած ենք այս ֆիլմին, Էրիք: Ես հպարտ եմ, Քըրքը հպարտ պիտի ըլլար… Դուք հնարաւորութիւն տուիք աշխարհասփիւռ հայերուն լսելի դարձնելու իրենց ձայնը», – գրած է Շերը:
Ֆիլմը նկարահանած է «Survival Pictures» շարժանկարի ընկերութիւնը, որ կը ղեկավարեն Էրիք Իսրայիլեանը եւ Էնթընի Մանտեկիչը: Քրքորեանի Tracinda Corporation-ը կը ֆինանսաւորէ շարժանկարի ընկերութիւնը` ինչպէս այս, այնպէս ալ այլ շարժանկարային նախագիծեր: Քըրքորեանի իրաւաբան Պաթրիշա Կլեյզըրը պատմած է, որ Survival Pictures-ը ծնած է գործարարին անյագ ցանկութենէն` պատմելու ու ներկայացնելու ոգեշնչող մարդկային պատմութիւններ ամբողջ աշխարհի հանդիսատեսին: Ան ըսած է նաեւ, որ Քըրքորեանը շատոնց կ’երազէր անձամբ մասնակցիլ ֆիլմի ստեղծման եւ դերասանական կազմի ընտրութեան աշխատանքներուն: Կլեյզըրի բնորոշմամբ` «Խոստումը» հոյակապ սիրային պատմութիւն է, ինչպէս նաեւ` առաջամարտիկ` մարդու իրաւունքներու ասպարէզին մէջ:
Քրիսթիան Պէյլի, Շառլոթ լը Պոնի եւ Օսքար Այզեքի գլխաւոր դերակատարմամբ ֆիլմի համաշխարհային անդրանիկ ցուցադրութիւնը կայացաւ 11 Սեպտեմբերին` Թորոնթոյի միջազգային շարժանկարի փառատօնի ընթացքին։