27 Նոյեմբերի առաւօտուայ կողմ Թիֆլիսի 14-րդ դարու Մուղնեցոց Ս. Գէորգ հայկական եկեղեցին հրդեհի մատնուած է: Հրդեհին հետեւանքով այրած է եկեղեցւոյ միակ կանգուն պատին՝ երբեմնի կեդրոնական մուտքին դուռը: Այս մասին յայտնած է «AliQ»ը:
Ըստ աղբիւրին, եկեղեցւոյ մէջ ապրող անօթեւան կին մը խոստովանած է, որ հրդեհը, ամենայն հաւանականութեամբ, բռնկած է իր վառած կրակէն:
«Եկեղեցու տարածքը մաքրել եմ, երեկոյեան գալիս եմ այստեղ գիշերում, ջուր բերում, ուտելիք եմ պատրաստում: Երեկոյեան կրակ վառեցի ջուրը տաքացնելու համար, յետոյ յանկարծ աչքս կպաւ: Երբ արթնացայ՝ իրերիս մի մասն արդէն այրուել էր»:
Դեպքի առթիւ «AliQ» հեռախօսազրոյց ունեցած է Վիրահայոց թեմի մամլոյ խօսնակ Սուսաննա Խաչատրեանին հետ, որ ըսած է. «Վիրահայոց թեմի առաջնորդը վաղ առաւօտեան մեկնել է եկեղեցի եւ անձամբ ծանօթացել իրավիճակին: Ամենայն հաւանականութեամբ, հրդեհի պատճառը տարածքում ապրող անօթեւան մարդկանց անուշադիր վերաբերմունքն է: Հարցն ուսումնասիրւում է»:
Խաչատրեան պարզաբանած է նաեւ, որ եկեղեցին ցանկապատուած է, սակայն անօթեւանները կարողացած են անցք մը գտնել եւ ներս մտնել:
Մինչ Վրաստանի ներքին գործոց նախարարութեան մամլոյ ծառայութենէն յայտնած են, որ հարուցուած է քրէական գործ Վրաստանի ՔՕ 118-րդ յօդուածի համաձայն, որ կ’ենթադրէ գոյքի վնասում կամ անուշադրութեան պատճառով գոյքի ոչնչացում:
Յիշեցնենք, որ Մուղնեցոց Ս. Գէորգ եկեղեցին Վրաստանի յայտարարած վիճահարոյց եկեղեցիներու շարքին է: 2009 թուականէն կիսախարխուլ է, Վրաստանի մշակոյթի եւ յուշարձաններու պահպանութեան նախարարութեան հաշուեկշիռին մէջ է: