– ԼՂՀ պաշտպանութեան նախարարութիւնը կը տեղեկացնէ, որ Դեկտեմբեր 31-ի եւ լոյս Յունուար 1-ի գիշերը ղարաբաղա-ատրպէյճանական սահմանին վրայ հակառակորդը հրադադարը խախտած է մօտ 80 անգամ, որուն ընթացքին հայկական կողմին ուղղութեամբ արձակուած է 1,400 կրակոց։ Հայկական կողմը հարկադրուած էր առնել համապատասխան քայլեր։
– Ամանորի եւ Սուրբ Ծննդեան տօներուն առիթով, նախագահ Սերժ Սարգսեան, Գարեգին Բ. կաթողիկոս եւ պաշտպանութեան նախարար Վիգէն Սարգսեան Դեկտեմբեր 31-ին այցելած են ՀՀ հիւսիս-արեւելեան սահմանի մարտական դիրքեր խանդավառելով հայ քաջարի բանակի զինուորները։
– Ամսուն 31-ին տեղի ունեցած է աւագ լէյտենանտ Շաւարշ Մելիքեանի յուղարկաւորութիւնը Շիրակի մէջ, որ զոհուած էր օրեր առաջ Չինարի գիւղէն հարաւ-արեւելք գտնուող պետական սահմանին մօտ։
– Այլ մարտիկի մը՝ Գարիկ Վարդանեանի վիճակը կը մնայ ծայրայեղ ծանր, որ վիրաւորուած էր ամսուն 29-ի գիշերը սահմանին վրայ ատրպէյճանական ներխուժման փորձի ընթացքին։ Վարդանեան տեղափոխուած է Երեւան։
– «Հաց բերող» Արթուր Սարգսեանը ազատութեան մէջ է։ Ան Յուլիս 26-ին «Սասնայ ծռեր» խումբին սննդամթերք տարած էր իր սեփական մեքենայով ճեղքելով ոստիկանական պատնէշը եւ վտանգելով իր կեանքը։ Արթուր Սարգսեան մեղադրուած է «Սասնայ ծռեր» խումբին օժանդակելուն մէջ։