Նոր աւիւնով, նոր տաղանդներով և նորանոր յայտագրերով լիացած Հայկական Բարեգործական Ընդհանուր Միութեան Սաթամեան թատերախումբը 2017 տարին թևակոխեց իր առաջին թատերգական կատակերգութիւնով՝ «Թենոր մը կ՚ուզուի» ներկայացումով:
Ստեղծագործ կամքը միշտ յաղթահարած է կեանքի ուղիներու մէջ, որտեղ կ՚ակնբախէր
Սաթամեան թատերախումբը իր ղեկավարութեամբ, դերասաններով և բեմադրական ճարտար պատրաստութեամբ, հակառակ վայրի, օդի և կարելիութիւններու անյարմարութեանց և սահմանափակումներուն: Բեմադրիչ Գրիգոր Սաթամեան, որուն անունով արժանիօրէն կոչուած է սոյն թատերախումբը, ներկայացման աւարտին խօսք առնելով, նախ՝ շնորհաւորեց երիտասարդ և տաղանդաւոր նոր դերասանները, որոնք արհեստավարժ և փորձառու դերասաններու կողքին կը ներկայանային որպէս ապագայ սերմնացաններ հայ արուեստի, մշակոյթի և թատրոնի բեմերուն վրայ, ապա՝ ներողամտութիւն խնդրեց ներկաներէն տեղւոյն անյարմարութեան և եղած կարգադրութեանց համար, որոնք հակառակ այդ բոլորին՝ աւելի մտերմիկ և ջերմ մթնոլորտ մը ստեղծած էին ներկաներուն մօտ, զիրենք հաւաքելով ընտանենման բարոյահաճոյ երդիքի մը ներքև, կարծէք ներկաները մասնակից դարձնելով բեմադրութեան հետ: Սաթամեան ըսաւ, թէ մօտ ատենէն հայ հասարակութիւնը պիտի վայելէ Քալիֆորնիոյ Փասատինա քաղաքին մէջ իր կառուցման աւարտին հասած ՀԲԸՄ-ի նորակառոյց համալիրը, հայ համայնքին նուիրելով իր առաջին աննման և մշակութային կեդրոնը, ուր ելոյթ պիտի ունենայ Սաթամեան թատերախումբը այլ մշակութային միջոցառումներու կողքին:
«Թենոր մը կ՚ուզուի» կատակերգութինը, ամերիկացի թատերագիր Քէն Լուտվիկի հեղինակութիւնն է, որ թարգմանուած և պատրաստուած էր Գրիգոր Սաթամեանի կողմէ, ինչպէս նախկին բոլոր օտար թատերգութիւնները, որոնք ցուցադրուած են ՀԲԸՄ-ի բեմերու վրայ: Կատակերգութիւնը երկու արարով կը ցոլացնէր հայ արուեստագիտական փորձառու և երիտասարդ տաղանդները, որոնք իսկապէս արժանի են գնահատանքի, ինչպիսին են՝ Ռուբէն Հարմանտայեան, Ալէքս Խուրշիտեան, Արի Լիպարիտեան, Ալիսըն Քէշիշեան, Արփի Սամուէլեան, Փիթըր Նշան, Մարալ Նաշալեան և Արփի Պալապանեան: Կարելի չէ չյիշել նաև գործնական անձնակազմի անդամներ՝ Վիգէն Պալապանեանի, Մանուկ Սաթամեանի, Ռաֆֆի Սաթամեանի, Ռաֆֆի Գալամքարեանի, Ռիթա Քէշիշեանի, Լիւսի Պալապանի, Ալին Պարոնեանի, Ռիթա Դալար Պետրոսեանի, Սերժ Նաւեանի, Շաքէ Թումայեանի և Ազնիւ Սապունճեանի անունները, որոնցմէ իւրաքանչիւրը, իր ուրոյն մասնագիտութեամբ և գործով, գործօն օղակը հանդիսացան համայն թատերական ներկայացման յաջողութեան, գլխաւորութեամբ՝ Գրիգոր Սաթամեանին:
Անտարակոյս էր «Թենոր մը կ՚ուզուի» կատակերգութեան յաջողութիւնը: Իսկ անոնք որոնք չկարողացան ներկայ գտնուիլ ելոյթներուն, անգլերէնով կ՚ըսեն՝ “Better luck next time”։