ԱՄՆ.- Նախագահ Թրամփ անգամ մը եւս հերքեց, թէ իր վարչակազմը Ռուսիոյ իշխանութիւններուն հետ որեւէ ձեւով կապ ունի։ NBC-ին տուած հարցազրոյցին ընթացքին ան պնդած է, որ նախընտրական իր ընտրական մեքենային եւ Ռուսիոյ իշխանութիւններուն միջեւ շփումներ եղած չեն։
ԱՏՐՊԷՅՃԱՆ.- Ատրպէյճանական մեծագոյն դրամատունը՝ Միջազգային դրամատունը Մայիս 13-ին Նիւ Եորքի մէջ յայտարարեց իր սնանկութեան մասին։ Պարտքը կը կազմէ 3,3 միլիառ տոլար եւ այս ձեւին դիմած են պարտքը վերաձեւակերպելու համար։ Սնանկութեան պատճառը քարիւղի ցած գիներն են։ Սնանացած է նաեւ Մոսկուայի մէջ գործող Ատրպէյճանի Միջազգային Դրամատան քոյր բաժանմունքը։
ՖՐԱՆՍԱ.- Ֆրանսայի նորընտիր նախագահ Էմանուէլ Մաքրոնը երկրի վարչապետ նշանակեց Հաւր քաղաքի քաղաքապետ, աջ կեդրոնամէտ Էտուար Ֆիլիփը։
ՍՈՒՐԻԱ.- ԱՄՆ-ի եւ Թուրքիոյ նախագահներ Թրամփի եւ Էրտողանի հանդիպումին ընթացքին պիտի քննուի Սուրիոյ քիւրտերուն ԱՄՆ-ի կողմէ ցոյց տրուող աջակցութիւնը։ Թուրքիա կը շարունակէ պնդել, որ Սուրիոյ քիւրտերը կապեր ունին Քրտական աշխատաւորական կուսակցութեան հետ։ Իսկ Ամերիկա Սուրիոյ քիւրտերը կը համարէ «Իսլամական պետութեան» դէմ մարտնչող հիմնական ուժ։
ԹՈՒՐՔԻԱ.- Թուրքիոյ զինուած ուժերը կը պատրաստուին նոր ռազմախարիսխ հիմնել Սուրիոյ հիւսիսը գտնուող էլ Պապ շրջանին արեւմուտքը՝ Աքիլի բարձունքին վրայ։
ՉԻՆԱՍՏԱՆ.- Նախագահ Սի Ցզինփին ողջունած է Փեքինի մէջ ընթացող միջազգային համագործակցութեան «Մէկ գօտի, մէկ ճանապարհ» հաւաքի մասնակիցները, որոնց շարքին 30 երկիրներու ղեկավարներ, ներառեալ՝ ռուս նախագահ Փութին։ Փեքինի այս նախաձեռնութիւնը կրնայ ընդգրկել աշխարհի բնակչութեան 60 տոկոսը։