ԻՐԱՆ. Իրանի ռազմատիեզերական ուժերու հրամանատար Ամիր Ալի Հաճիզատէն յայտարարած է, թէ Իրան տասը թոն կշռող սեփական արտադրութեան ռումբ ունի։ ԱՄՆ ունի բոլոր ռումբերուն մայրը, իսկ Իրան ունի «ռումբերուն հայրը», ըսած է ան։ Նշենք, թէ ամերիկեան «մայր ռումբը» գործածուեցաւ 2017ի Ապրիլին Աֆղանիստանի մէջ։ Ռումբին երկարութիւնն էր շուրջ 27 ոտք, իսկ ծանրութիւնը՝ 10 թոն։
ԱՆԳԼԻԱ. Մեծն Բրիտանիոյ ոստիկանութիւնը ձերբակալած է երկու հոգի, որոնք կը կասկածուին Սեպտեմբեր 15ին, Լոնտոնի մեթրոյի կայարաններէն մէկուն վակոնին մէջ տեղադրուած ռումբին յանցանքով, պատճառ դառնալով երկտասնեակ մը վիրաւորներու։ «Իսլամական պետութիւն»ը ստանձնած է պատասխանատուութիւնը։
ԹՈՒՐՔԻԱ. Վրաստանի սահմանին վրայ Թուրքիոյ մէջ դատապարտուած Ռուսիոյ քաղաքացի մը փորձած է անօրինական ձեւով տեղափոխուիլ Վրաստան։ Ան պահուըտած է ճամպրուկի մը մէջ եւ ապա ձերբակալուած։
ՔԻՒՐՏԻՍՏԱՆ. Սպիտակ տունը Իրաքեան Քիւրտիստանին կոչ ըրած է չեղեալ յայտարարել անկախութեան հանրաքուէն, որ նշանակուած է Սեպտեմբեր 25ին։ Վիճելի տարածքներու մէջ նման հանրաքուէի կայացումը կրնայ աւելի ապակայունացնել շրջանը, կ՚ըսուի ամերիկեան կոչին մէջ։
ԳԵՐՄԱՆԻԱ. Պերլին մտադիր է ա՛լ աւելի սահմանափակել տնտեսական գործակցութիւնը Անքարայի հետ, Թուրքիոյ մէջ կալանաւորուած իր հայրենակիցները ազատագրելու համար։ Գերմանիոյ աւելի քան 50 քաղաքացիներ այսօր տակաւին կը մնան թրքական բանտերու մէջ։