Երեքշաբթի, 21 Սեպտեմբերի, 2021

Շաբաթաթերթ

Մայիսի 9-ը՝ Մայր Աթոռ Սուրբ Էջմիածնում

Մայիսի 9-ին՝ Յաղթանակի ու խաղաղութեան տօնին, Մայր Աթոռ Սուրբ Էջմիածնի միաբանութիւնը Սուրբ Պատարագի արարողութեանը մասնակցեց Սուրբ Գայիանէ վանքում։ Պատարագիչն էր Մայր Աթոռ Սուրբ Էջմիածնի Գէորգեան հոգեւոր ճեմարանի տեսուչ Հոգեշնորհ Տ․ Մեսրոպ վարդապետ Պարսամեանը։

Հայր Սուրբը, իր քարոզում անդրադառնալով օրուայ խորհրդին,  ի մասնաւորի նշեց․ «Այսօր մայիսի 9-ն է` մեր յաղթանակների եռատօնը, երբ յիշատակում ենք յաղթանակը Հայրենական մեծ պատերազմում, Շուշիի ազատագրումը եւ Արցախի պաշտպանութեան բանակի ստեղծման տարեդարձը։ Այսօր, սակայն, երբ Երկրորդ համաշխարհային պատերազմը հեռաւոր մի իրականութիւն է նոր սերնդի համար, երբ Շուշին գտնւում է թշնամու վերահսկողութեան տակ, իսկ Արցախի Պաշտպանութեան բանակի հետագայ ճակատագիրը մշուշոտ է, թւում է, անհնար է խօսել յաղթանակների մասին։ Սակայն հենց այս մռայլ օրերին է, որ աւելիով կարիքն ունենք լսելու յաղթանակի պատգամը եւ յիշատակելու յաղթանակի այն ոգին, որը գրաւականն է մեր բոլոր յաղթանակների»:

Հայր Մեսրոպը, խօսելով նաեւ Քրիստոսի չարչարանքների, խաչելութեան եւ յաղթական յարութեան մասին, ընդգծեց, որ նոյնիսկ յուսաբեկութեան ամենածանր օրերին, ինչպէս մեր Տիրոջ Յարութեան աւետիսից առաջ առաքեալներն ու Նրա հետեւորդներն էին, պէտք է յաղթանակի լոյսը առաջնաշարժիչ ուժ լինի եւ խոստումնալից ապագայի կերտումը՝ նպատակակէտ մեզ համար։

Հայր Սուրբը յաւելեց, որ այս օրերին, նաեւ սրտաբուխ աղօթքով յիշատակում ենք բոլոր նրանց, որոնք հաւատով եւ յաղթանակի զգացումով դարերի հոլովոյթում նահատակուեցին յանուն ազատ կեանքի, յանուն իրենց քրիստոնէական հաւատի եւ սրբազան հայրենիքի։ Ապա աղօթք վերառաքելով առ Աստուած՝ Հոգեշնորհ Հայր Սուրբը հայցեց Տիրոջից, որ Երկնքի Արքայութեան լոյսերի մէջ բնակեցնի մեր բոլոր նահատակների հոգիները։

Սուրբ Պատարագի աւարտին, նախագահութեամբ Մայր Աթոռ Սուրբ Էջմիածնի լուսարարապետ Գերաշնորհ Տ․ Մուշեղ եպիսկոպոս Բաբայեանի, կատարուեց հոգեհանգստեան արարողութիւն` Հայրենական մեծ պատերազմի եւ Արցախեան հերոսամարտի ընթացքում զոհուած քաջորդիների հոգիների հանգստութեան խաղաղութեան համար:

Վերջում Հայր Սուրբը մաղթեց, որ Ամենակարողն Աստուած պահի ու պահպանի մեր նուիրական հայրենիքը եւ իմաստնութիւն ու խորագիտութիւն պարգեւի ամէնքին, որպէսզի կարողանանք ազգովին համախումբ կերտել մեր յաղթական գալիքը՝ ի փառս Ամենասուրբ Երրորդութեան, ի պայծառութիւն մեր հայրենիքի եւ մեր Առաքելական Մայր Եկեղեցու։

Նոյն օրը Մայր Աթոռի Սուրբ Էջմիածնի միաբաններն այցելեցին «Յաղթանակ» զբօսայգի, որտեղ Անյայտ զինուորի յուշարձանին ծաղկեպսակներ զետեղելուց յետոյ իրենց  յարգանքի տուրքը մատուցեցին Հայրենական մեծ պատերազմում եւ Արցախեան հերոսամարտում զոհուածների անմար յիշատակին:

ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ