Գերագոյն հոգեւոր խորհուրդը, քննարկելով Հայաստանում համավարակային իրավիճակը, խորը մտահոգութեամբ եւ ցաւով արձանագրեց վարակուածութեան ցուցանիշների եւ դրանով պայմանաւորուած մահացութեան թուերի աճը:
Գերագոյն հոգեւոր խորհուրդը վերահաստատեց Մայր Աթոռ Սուրբ էջմիածնի դիրքորոշումն առ այն, որ քորոնավիրուսի դէմ պատուաստումը հոգեւոր վտանգ չի ներկայացնում: Կարեւորուեց, որ համավարակի ներկայ պայմաններում անձնական ազատութիւնը խստօրէն համադրուի հանրային պատասխանատուութեան հետ` չվտանգելու համար սեփական եւ այլոց կեանքերը:
Բարձր գնահատանքով անդրադարձ կատարուեց բժիշկների եւ բուժաշխատողների` մարդկային կեանքեր փրկելու նուիրեալ ծառայութեանը:
Գերագոյն հոգեւոր խորհուրդն անհրաժեշտ համարեց նաեւ, որ առողջապահութեան ոլորտի պատկան մարմինները միջոցներ ձեռնարկեն պատուաստման օգտակարութեան եւ հետեւանքների վերաբերեալ հակասական տեղեկութիւնների տարածումը կանխելու ուղղութեամբ` համավարակի դէմ պայքարի արդիւնաւէտութիւնը բարձրացնելու համար:
Ժողովի կողմից վերստին կոչ ուղղուեց` պահպանել կանխարգելիչ բոլոր միջոցները համավարակի յաղթահարման համար: