Երեքշաբթի, Դեկտեմբեր 6, 2022

Շաբաթաթերթ

Ամենայն Հայոց Կաթողիկոսն Ընդունեց Արցախի Նախագահին

Ապրիլի 30-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում հանդիպում ունեցաւ Արցախի Հանրապետութեան նախագահ Արայիկ Յարութիւնեանի հետ:

Ամենայն Հայոց Կաթողիկոսն, ի դէմս նախագահի, իր օրհնութիւնն ու բարեմաղթանքները փոխանցեց Արցախի ժողովրդին` վստահութիւն յայտնելով, որ Հայաստանի եւ Արցախի համար այս ծանր ու պատասխանատու ժամանակահատուածում առկայ բոլոր դժուարութիւնները կը դիմագրաւուեն համազգային միասնականութեամբ ու մեր ժողովրդին յատուկ արիութեան եւ տոկունութեան ոգով:

Արցախի նախագահն իր երախտագիտութիւնը յայտնեց Վեհափառ Հայրապետին` Արցախին մշտապէս սատար կանգնելու համար, ընդգծեց, որ հերթական անգամ հայ ժողովուրդը` մասնաւորապէս արցախահայութիւնը, ճակատագրական ժամանակներ է ապրում, եւ Ամենայն Հայոց Կաթողիկոսի ու հոգեւոր դասի աղօթքները շատ կարեւոր են առկայ փորձութիւնները յաղթահարելու համար:

Հանդիպմանն անդրադարձ կատարուեց արցախահայութեան առջեւ ծառացած մարտահրաւէրներին, 44–օրեայ պատերազմի հետեւանքների յաղթահարմանն ուղղուած քայլերին եւ անվտանգութեան խնդիրներին: Մտահոգութիւն արտայայտուեց Ադրբեջանի կողմից շարունակուող սադրիչ գործողութիւնների եւ հայատեաց քաղաքականութեան կապակցութեամբ: Նորին Սրբութիւնն ու ԱՀ նախագահը կարեւորեցին բարեկամ երկրների եւ միջազգային հանրութեան զօրակցութիւնը Արցախի ժողովրդի ազատ ու անկախ ապրելու իրաւունքի պաշտպանութեան գործում` անհրաժեշտ նկատելով նաեւ աշխարհասփիւռ հայութեան հետեւողական աջակցութիւնը` ի նպաստ Արցախի զօրացման եւ ապահով ու անվտանգ կեանքի կերտման:

Զրոյցի ընթացքում մասնաւոր անդրադարձ կատարուեց Արցախի թեմի գործունէութեանը, Ադրբեջանի վերահսկողութեան տակ յայտնուած տարածքներում հայկական հոգեւոր–մշակութային, պատմական ժառանգութեան պահպանութեան խնդիրներին:

ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ