Միացեալ Նահանգներու Արեւմտեան Թեմի Առաջնորդ՝ Գերշն. Յովնան Արք. Տէրտէրեանի ներկայութեամբ եւ մասնակցութեամբ, տարիներէ ի վեր աւանդութիւն դարձած է Հոգեւորականներու Միօրեայ Ժողովներու ընթացքին, Ժողովական օրակարգի տարբեր նիւթերու կարգին, ունենալ նաեւ Հոգեւորականներու կողմէ դասախօսական ելոյթներ՝ աստուածաբանական, Եկեղեցական, Ծիսական, Հովուական եւ Քրիստոնէական Դաստիարակութեան վերաբերող այլազան նիւթերով:
Այս օգտաշատ աւանդութիւնը շարունակելով, Երեքշաբթի, Հոկտեմբեր 4, 2022ին, Թեմիս Առաջնորդարանէն ներս (Պըրպենք), Թեմի բոլոր Հոգեւորականներու ներկայութեամբ, տեղի պիտի ունենայ 2022 տարուան վերջին միօրեայ Ժողովը:
Նկատի ունենալով, որ 2022 թուականը կը նշէ Արեւմտեան Թեմի պաշտօնական հաստատման 95րդ տարեդարձը (1927), Հաւատացեալներու «Քրիստոնէական Կեանքը» աւելի խթանելու եւ խորացնելու հեռանկարով, ընտրուած է «ԵԿԵՂԵՑԻՆ Կ’ԱՂՕԹԷ» ընդհանուր բնաբանը: Այս բանաձեւումը, իբր հոգի ու գաղափարական, կ’արտայայտէ Արեւմտեան Թեմի կրօնական առաքելութիւնը առաջնորդող հիմնական հոգին:
Այս առիթով, Միօրեայ Ժողովին պիտի ներկայացուին երեք շահեկան նիւթեր.¬
- «Եկեղեցին կ’աղօթէ», եկեղեցական-աստուածաբանական մերձեցում (նիւթը կը ներկայացնէ Հոգշն. Տաճատ Ծ. Վրդ. Եարտըմեան):
- «Աստուծոյ Խօսքը ներկայ է Եկեղեցւոյ Ծիսական Աղօթքի Կեանքին մէջ» (կը ներկայացնէ Արժն. Տ. Եղիշէ. Քհնյ. Քսաճիքեան):
- «Մարդոց սրբութիւնը Եկեղեցւոյ Աղօթքին էական նպատակն է եւ Առաքելութիւնը» (կը ներկայացնէ Արժն. Տ. Աւետիս Քհնյ. Աբովեան):
Այս ելոյթներուն պիտի մասնակցի նաեւ Միացեալ Նահանգներու Արեւելեան Թեմի նախկին Առաջնորդ՝ Գերշն. Դանիէլ Եպս. Ֆընտգեան, որու ներկայացնելիք նիւթի մասին պիտի անդրադառնանք յաջորդաբար:
Ուշագրաւ եւ յագեցնող նիւթեր են ասոնք, որոնց մէջ թէ՛ Հոգեւորականը եւ թէ՛ հաւատացեալը հաւասարապէս կրնայ եւ պէտք է ինքզինքը գտնէ եւ տեղադրէ Եկեղեցւոյ «Հոգեւոր» կեանքէն ներս: Վերոյիշեալ նիւթերը հաստատապէս կրնան նպաստել, որ Քրիստոնեայ հաւատացեալին կեանքը սերտօրէն կապուած մնայ Եկեղեցւոյ «աստուածային» առաքելութեան:
Ժողովական Հայրերու հովուական համոզումն է, որ Եկեղեցւոյ կապուած հաւատացեալներուն կեանքը եւ հոգեւոր աճումը անպայման կը գտնէ իր հոգեկան լուսաւորութիւնը եւ յագեցումը:
ԴԻՒԱՆ ԱՌԱՋՆՈՐԴԱՐԱՆԻ