Անվերադարձ Հեռացաւ Մեր Բազմատաղանդ Լութֆի Թապագեանը
Երկար ու անողոք հիւանդութենէ ետք մեր շարքերէն հեռացաւ տիպար մտաւորականը, դերասանը, թատերագէտը, հրատարակիչը, հայրենասէրը, «Նոր Օր»ի խմբագիրներէն մէկը, կուսակցականը, թէքէեանականը, ամուսինն ու հայրը:
Լիբանանի Մխիթարեան վարժարանը աւարտելէ ետք Ընկ. Լութֆի Թապագեան Հայրենիք մեկնեցաւ ուսանելու եւ փայլուն արդիւնքներով աւարտեց Երեւանի Գեղարուեստա-թատերական հաստատութիւնը, որմէ անմիջապէս ետք վերադարձաւ Պէյրութ եւ լծուեցաւ հայ մշակութային կեանքի զարգացման: Թատրոնը իր կեանքն էր, գիրքն ու թերթը իր սէրերը, անշահախնդիր մամուլն ու հրապարակագրութիւնը՝ իր տարերքները:
Իր գործակիցներուն հետ ան մասնակցեցաւ սփիւռքահայ մամուլի մէջ խիզախ, անաչառ եւ ժամանակակից ձեւաւորումով «ԵՐԻՏԱՍԱՐԴ ՀԱՅ»ի հրատարակութեան, որուն ընթերցողներէն շատեր, յատկապէս երիտասարդներ, դարձան նոր որակի հայ գործիչներ:
Հրատարակչութեան մէջ անուրանալի դեր ունեցաւ ան՝ թէ՛ Լիբանանի եւ թէ՛ Լոս Անճելըսի մէջ: Արդարեւ «Էրեբունի» մատենաշարը հայ եւ օտար հասարակութեան մատուցեց բարձր որակով հրատարակութիւններ՝ նուիրուած հայ արուեստին:
Յառաջիկային աւելի մանրամասնօրէն պիտի անդրադառնանք մեր հանգուցեալ ընկերոջ կեանքին, վաստակին եւ յուղարկաւորութեան մանրամասնութիւններուն:
Առ այդ ԸՆկ. Լութֆի Թպագեանի ընտանիքին եւ հարազատերուն կը յայտնենք մեր ամենախորին ցաւակցութիւնները: Յիշատակն արդարոյն օրհնեալ եղիցի:
ՌԱԿ Արեւմտեան Ամերիկայի Շրջանային Վարչութիւն
«Նոր Օր»ի խմբագրական եւ Վաչական կազմ