«Դատապարտեալներու հիւանդանոց»-ը գտնուող «Սասնայ ծռեր»-ու անդամ Աշոտ Պետրոսեան 8 օգոստոսին հանդիպում ունեցած է յօրինող Տիգրան Մանսուրեանի հետ եւ անոր հետ զրուցելէ ետք դադրեցուցած է 4 օր առաջ սկսած հացադուլը: Այս մասին «Նիուզ»-ին յայտնած է Աշոտ Պետրոսեանի փաստաբանը` Արա Պապիկեան` նշելով, որ Աշոտ Պետրոսեան արդէն կը ստանայ բժշկական օգնութիւն, զոր կը մերժէր հացադուլի օրերուն:
Փաստաբանը նաեւ յայտնած է, որ Տիգրան Մանսուրեանն ու Աշոտ Պետրոսեանը շուրջ 2 ժամ զրուցած են` նշելով, որ թէեւ Աշոտ Պետրոսեան դադրեցուցած է հացադուլը, բայց պիտի փորձեն հանդիպում կազմակերպել նաեւ անոր ու յօրինող Ռոպերթ Ամիրխանեանին միջեւ:
Նախապէս հաղորդուած էր, որ «Սասնայ ծռեր»-ու անդամ, գեղանկարիչ Աշոտ Պետրոսեանը, որ հրազէնային վնասուածք ունի, կ՛ուզէ հանդիպում ունենալ յօրինողներ Տիգրան Մանսուրեանի եւ Ռոպերթ Ամիրխանեանի հետ: Ան 4 օգոստոսին սկսած էր հացադուլի եւ կը մերժէր բժշկական օգնութիւն ստանալ: