ՔԱԼԻՖՈՐՆԻՈՅ, ՀԱՅԱՍՏԱՆԻ ԵՒ ԱՐՑԱԽԻ ՅԱՐԱԲԵՐՈՒԹԵԱՆՑ ԱՄՐԱՊՆԴՈՒՄ
Քալիֆորնիոյ Նահանգային Ծերակոյտի Օրէնքներու Յանձնախումբը պատմական քայլ մը առաւ, կազմելով Քալիֆորնիոյ, Հայաստանի եւ Արցախի առեւտուրի, արուեստի եւ մշակոյթի փոխանակման եւ զարգացման յատուկ յանձնախումբը:
Այս յանձնախումբի կազմութեան մէջ մեծ դեր ունեցան Ծերակոյտի հայասէր անդամները: Յանձնախումբի ատենապետ ընտրուեցաւ հայութեան ջերմ բարեկամներէն՝ ծերակուտական Էնթընի Փորթանթինօ:
ԴՈԿՏ. ՏԷՐ ՄԱԹՈՍԵԱՆԻ ՀԱՏՈՐԸ
Ֆրեզնոյի Հայագիտական Ուսմանց Ընկերակցութիւնը (SAS), իր տարեկան «Արտակարգ հատոր»ի մրցանակը շնորհած է Դոկտ. Պետրոս Տէր Մաթոսեանի «Յեղափոխութեան փշրուած երազներ, ազատութիւն եւ վայրագութիւն Օսմանեան Կայսրութեան վերջին շրջանին» (“Shatered Dreams of Revolution: From Liberty to Violence of Late Ottoman Empire) աշխատութեան:
Դոկտ. Տէր Մաթոսեան ծնած է Երուսաղէմ: Դոկտորական կոչումը ստացած է Քոլոմպիա համալսարանէն: Ան դասաւանդած է MIT աշխարհահռչակ համալսարանի Պատմութեան բաժանմունքին մէջ: Ներկայիս դասախօս է Նեպրասքայի համալսարանի Պատմութեան բաժնին մէջ: SAS-ի մասին յաւելեալ տեղեկութեանց համար դիմել Society for Armenian Studies կայքին:
ՀԱՅ ԱՒԵՏԱՐԱՆԱԿԱՆ ՄԻՈՒԹԵԱՆ ՆՊԱՍՏԸ ՀԱՅԿԱԿԱՆ ԲԱՆԱԿԻՆ
Հայոց բանակին օժանդակութեան համար Ամերիկայի Հայ Աւետարանական Միութիւնը 400 հազար տոլար արժողութեամբ բժշկական պիտոյքներ, գործիքներ եւ մահճակալներ ղրկեց Հայաստան: Այս ապրանքներու Հայաստան առաքման ծախսերը հոգաց Տոքթ. Քրիս Թաշճեան:
Այս պիտոյքները խիստ անհրաժեշտ են մեր բանակի բժշկական կեդրոններուն համար, ըսաւ բանակի, զինուորական հիւանդանոցներու եւ բժշկական կեդրոններու ղեկավար գնդապետ Առաքելեան:
Ի ՆՊԱՍՏ ՍՈՒՐԻԱՀԱՅՈՒԹԵԱՆ
ՀԲԸՄ Մանուկեան-Տեմիրճեան վարժարանի աշակերտները շատ գեղեցիկ գաղափարը ունեցած են նուագահանդէս մը կազմակերպելու, որուն հասոյթը ամբողջութեամբ յատկացուցին Սուրիահայութեան Օգնութեան Հիմնադրամին (SARF): Խումբ մը աշակերտներ “The Banned Club” անունով նուագախումբ մը կազմած էին, որուն մաս կազմած էր նաեւ Պուէնոս Այրէսի ՀԲԸՄ Մարի Մանուկեան վարժարանէն աշակերտ մը: Անոնք շատ գեղեցիկ ելոյթով մը խորապէս գոհ ձգեցին ներկաները, արժանանալով հանդիսականներու ջերմ ծափահարութեանց:
Ս. ՊԵՏՐՈՍ ԵԿԵՂԵՑՒՈՅ ՄԵԾ ՊԱՀՔԻ ԱՒԱՆԴԱԿԱՆ ԸՆԹՐԻՔԸ
Ուրբաթ, Մարտ 17, երեկոյեան ժամը 6։30-ին Վէն Նայսի Ս. Պետրոս եկեղեցւոյ Գարակէօզեան սրահին մէջ տեղի ունեցաւ Մեծ Պահքի աւանդական ընթրիք մը: Ձեռնարկը իր ներկայութեամբ կը պատուէր Թեմիս Բարեջան Առաջնորդ՝ Գերշ. Տ. Յովնան Արք. Տէրտէրեան:
Մեծ ժողովրդականութիւն վայելող այս ընթրիքը անցաւ շէն ու շէնշող մթնոլորտի մը մէջ, հոծ բազմութեան մը ներկայութեամբ:
ՄԱՐԿ ՆՇԱՆԵԱՆԻ «ՊԱՏԿԵՐ, ՊԱՏՈՒՄ, ՊԱՏՄՈՒԹԻՒՆ» ՀԱՏՈՐԻ ՔՆՆԱՐԿՈՒՄ
«Ապրիլ» գրատունը շատ գեղեցիկ գաղափարը ունեցած է «Շնչող Գրքի Ակումբ» անուան տակ գրասէրներու շրջանակ մը կազմակերպել, որուն գործը քննարկել, արժեւորել եւ գնահատել է հրատարակուած գիրքերը:
Շաբաթ, Մարտ 25-ին, կ. ե. ժամը 4-ին տեղի ունեցաւ ֆրանսահայ ծանօթ իմաստասէր Մարկ Նշանեանի «Պատկեր, պատում, պատմութիւն» հատորի քննարկումը: Գիրքը կը ներկայացնէ ֆրանսահայ լուսանկարիչ՝ Քարոլ Ֆիքէթէի նկարներուն, ինչպէս նաեւ քանի մը ֆրանսացի մտաւորականներու փիլիսոփայութեան մասին:
ՀՈԳԵՀԱՆԳՍՏԵԱՆ ՊԱՇՏՕՆ ԱՊՐԻԼ 2-Ի ՆԱՀԱՏԱԿՆԵՐՈՒ ՀՈԳԻՆԵՐՈՒՆ ՀԱՄԱՐ
Կիրակի, Ապրիլ 2, 2017-ին առաջին տարելիցն է Արցախի վրայ ատրպէյճանական լայնածիր եւ վայրագ յարձակումին: Այդ օրերուն հայոց բանակի քաջարի զինուորներ, պաշտպանելով մեր սահմանները եւ թշնամիին ալ մեծ վնասներ հասցնելով հանդերձ, տուինք մեծ թիւով զոհեր:
Վստահ ենք, որ այս Կիրակի մեր ժողովուրդը խուռներամ հայկական եկեղեցիներ երթալով, իր յարգանքի տուրքը պիտի տայ մեր նահատակ երիտասարդ զինուորներուն: