ՆՈՐ ՕՐ, ԼՈՍ ԱՆՃԵԼԸՍ.
Մեծարգոյ Դոկտ. Կարպիս Տէր Եղիայեան,
Ստեփանակերտի «Գրիգոր Նարեկացի» պետհաւատարմագրուած համալսարանի ուսանողական եւ փրոֆեսորադասախօսական կազմի անունից ի սրտէ շնորհաւորում եմ Ձեզ գիտակրթական, մշակութային, գեղարուեստական եւ մի շարք այլ բնագաւառներում ունեցած Ձեր բեղուն գործունէութեան 50-ամեակի կապակցութեամբ։
Դուք հայրենանուէր եւ անուրանալի գործունէութիւն էք ծաւալել իմաստալից 50 տարիների ընթացքում՝ թէ՛ որպէս «Մաշտոցի» նախագահ, ականաւոր գիտնական ու փրոֆեսոր, գրող ու հրապարակագիր, թէ՛ որպէս աստուածապաշտ քրիստոնեայ, ընտանիքի հայր եւ որդի, ազգային մեծ գործիչ… Կարելի է այսպէս երկար թուել Ձեր բարձր առաքելութիւններն ու բարեմասնութիւնները, որոնք ամբողջացնում են Ձեր՝ մեծ հայի, տիեզերական ընդգրկումների տէր մարդու կերպարը։ Դուք խոշորագոյն ներդրում ունէք նաեւ որպէս համաշխարհային խաղաղարար, միջազգային բազմաթիւ յանձնաժողովների ու կազմակերպութիւնների նախագահ… Եւ այդ ամէնի ակունքը մարդու եւ ազգի նուիրեալ զաւակի՝ Ձեր անսահման բարութիւնն է, մեծ հոգին…
Դուք, յիրաւի, անգնահատելի ներդրում էք ունեցել Ամերիկայի Միացեալ Նահանգներում հայկական բարձրագոյն կրթարանների ստեղծման եւ զարգացման, ինչպէս նաեւ սերունդների հայեցի դաստիարակութեան, հայապահպանութեան սուրբ գործում, ինչը եւ անվերապահօրէն գնահատուել է Ձեր գործընկերների, հազարաւոր սաների ու, առհասարակ, Ձեզ ճանաչողների կողմից։ Եւ ես կարծում եմ Կլենտէյլի «Մաշտոց» եւ Ստեփանակերտի «Գրիգոր Նարեկացի» համալսարանների համագործակցութիւնը հետաքրքիր կամուրջ է Արցախի եւ ԱՄՆ Կլենտէյլ քաղաքի հայկական համայնքի միջեւ, ի նպաստ մեր ժողովուրդի, մեր դպրութեան, մեր ազգային խնդիրների իրականացման։
Յարգարժան Դոկտ. Կարպիս Տէր Եղիայեան,
Հայոց Արեւելից աշխարհ Արցախի Գրողների Միութեան, «Գրիգոր Նարեկացի» համալսարանի փրոֆեսորադասախօսական կազմի, ուսանողութեան, ամբողջ ժողովուրդի կողմից մէկ անգամ եւս շնորհաւորելով Ձեզ յոբելեանի կապակցութեամբ՝ ցանկանում եմ քաջառողջութիւն, արցախեան երկարակեցութիւն, ստեղծագործական նորանոր վերելքներ՝ ինչպէս ազգանուէր գործունէութեան մէջ, այնպէս էլ անձնական կեանքում՝ ի բարօրութիւն համայն հայ ժողովրդի, համայն մարդկութեան։
ՎԱՐԴԱՆ ՅԱԿՈԲԵԱՆ
Ստեփանակերտի «Գրիգոր Նարեկացի» պետհաւատարմագրուած համալսարանի ռեկտոր, բանասիրական գիտութիւնների դոկտ. փրոֆ., Արցախի ԳՄ նախագահ, Հայաստանի մշակոյթի վաստակաւոր գործիչ