Հինգշաբթի, 9 Դեկտեմբերի, 2021

Շաբաթաթերթ

Հայկական Ճեմարանը Ծառատունկով Կը Տօնէ Իր Անդրանիկ Տարեվերջը

Փասատենա քաղաքի Պլեռ վարժարանի (Blair High School) մէջ այս տարի գործել սկսած Հայկական Ճեմարանը ծառատունկով մը կը տօնէ իր ուսումնական անդրանիկ տարուան աւարտը: Վարժարանը որոշած է ATP (Armenia Tree Project) կազմակերպութեան համագործակցութեամբ՝ իւրաքանչիւր 50 աշակերտի անունով ծառ մը տնկել Հայաստանի Աշտարակ քաղաքի մէջ: Այդ ծառերը մաս պիտի կազմեն նոյն կազմակերպութեան կողմէ հիմնուած սփիւռքահայ վարժարաններու յատուկ անտառին:

Այն հայցումին, թէ Ճեմարանը ինչո՞ւ որոշած է Հայաստանի մէջ ծառատունկ կատարել՝ նորաստեղծ վարժարանի վարիչ Նորայր Տատուրեանը այսպէս արտայայտուեցաւ. «Այդ յիսուն ծառերը խորհրդանշական են: Ծառը կը ներշնչէ բարձր գաղափարներ, ինչպէս՝ յաւերժութիւն, հողի եւ մարդու կապը, համեստօրէն ծառայել, պտղատու ըլլալ… Այս ծրագրի շնորհիւ մեր աշակերտները արմատ կը դնեն հայրենի հողի մէջ: Մեր նպատակն է սփիւռք-Հայաստան կապը ամուր եւ մնայուն պահել ու այդ ուղղութեամբ դաստիարակել հայրենանուէր սերունդներ»:

Աշակերտները ծառատունկի որպէս յիշատակ կը ստանան ATP-ի կողմէ պատրաստուած գեղատիպ շնորհակալագիր եւ շապիկ մը:

Վարժարանի Հայաստան-Փասատենա կապերու մէկ այլ դրսեւորումն էր Երեւանի Գաֆէսճեան Արուեստի Կեդրոնի հետ սկսած ուսումնական կապը: Աշակերտները հեռակայ դրութեամբ հետեւեցան կեդրոնի կողմէ պատրաստուած բազմաթիւ կրթական ծրագիրներուն, ինչպէս՝ «Հայկական պետական նշաններ», «Դիմակը պատմութեան մէջ», «Հայկական թռչնագիրը», ելն.: Դասընթացքները ներկայացուց կեդրոնի կրթութեան գիծով տնօրեն Լիզա Շիրինեանը:

Հայկական Ճեմարանը կը գործէ Փասատենայի Միացեալ Կրթական Տարածաշրջանի (PUSD) երդիքի եւ հովանաւորութեան տակ: Որպէս պետական վարժարան (6-12 րդ դասարաններ) ան անվճար հայեցի դաստիարակութիւն կը մատուցէ թէ՛ Փասատենայի եւ թէ՝ յարակից քաղաքներու հայորդիներուն: Ճեմարանը ունի վարկաւորուած (accredited) լիակատար հայկական ծրագիր եւ ունի հայերէնի բոլոր մակարդակներու համար դասարաններ: Արձանագրուելու կամ այլ տեղեկութիւններ ստանալու համար հեռաձայնել՝ Թալին Նազարեան (626) 396 5820 (ext. 80124):

ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ