Ուրբաթ, Դեկտեմբեր 2, 2022

Շաբաթաթերթ

Լուրեր Սահակ Մեսրոպ Վարժարանէն

ՍՈՆԱ ՊԱՏԱԼԵԱՆ

Համաճարակի որոշ չափով հեռացումը պատճառ դարձաւ եւ արթնցուց մեզ, որ ձերբազատինք եւ դիմաւորենք ուրախ, առողջ եւ փայլուն օրեր, մասնաւորաբար վայելելու մեր սիրասուն փոքրիկներուն կատարումները:

Այս գեղեցիկ առիթը օգտագործելով, դպրոցիս տնօրէնուհին՝ Մ. Պոյաճեան, հրաշալի գաղափար մը ունեցաւ բացառիկ եւ գրաւիչ յայտագրի մը գործադրութեան:

18 Յունիսի երեկոյեան, դպրոցիս բակը եռուզեռի մէջ էր, նոյն ժամանակ յարգելով ապահովութեան օրէնքները:

Նախակրթարանի եւ միջնակարգի աշակերտներուն մասնակցութեամբ՝ «Տիզնի Լենտ»ի յայտագիրէն քաղուած երգեր եւ պարեր ներկայացուեցան գեղեցիկ տարազներով, որոնք պահ մը բեմին փայլքը աւելցուցին, հանդիսատեսը փոխադրելով «Տիզնի Լենտ»:

Չմոռնալով մեր հայ մշակոյթը, եւ հայապահպանումը վառ պահելու մտահոգութեամբ՝ աշակերտները հայրենասիրական եւ գարնանային երգերու փունջ մը ներկայացուցին, դարձնելով երեկոն հաճելի եւ գողտրիկ, հրապուրելով ներկաներուն ուշադրութիւնը:

Խմբային արտասանութիւններով աշակերտներ հանդէս եկան հոգեշունչ եւ հայեցի մօտեցումով, խանդավառութիւն ստեղծելով ներկաներուն հոգիներուն մէջ, հաւատալով հայկական դպրոցին առաքելութեան: Ութերորդ կարգի աշակերտները ներկայացուցին նաեւ թատրոն մը:

Բոլոր աշակերտները իրենց պարտականութիւնները կատարեցին ինքնավստահութեամբ:

Գնահատելի էր աշխատանքը պարուսոյցներուն, երաժշտութեան եւ հայերէնի ուսուցիչներուն, որոնք մեծ նուիրումով իրենց ներդրումը բերին այս յայտագիրի յաջողութեան եւ վերելքին:

ԱՒԱՐՏԱԿԱՆ ՀԱՆԴԷՍՆԵՐ

 Ք. Սարեան մանկամսուրի ամավերջի հանդէսը տեղի ունեցաւ 25 Յունիսի յետմիջօրէին: Այդ օր, դպրոցին բակը նոր կեանքի կոչուած էր՝ ընդունելու ծնողներ եւ հարազատներ, որոնք եկած էին իրենց փոքրիկներուն դողդոջուն շրթներէն լսելու հայերէն եւ անգլերէն երգեր, սաղմոսներ, արտասանութիւններ եւ դիտելու տեսակաւոր պարեր:

 Փոքրիկները ժպտուն դէմքերով, գոյնզգոյն հագուստներով պարեցին եւ այցելեցին աշխարհի տարբեր շրջանները իրենց հաճելի ներկայացումներով:

 Ք. Սարեան մանկապարտէզի վկայականաց բաշխման հանդիսութիւնը տեղի ունեցաւ 26 Յունիսի երեկոյեան, դպրոցիս շրջափակին մէջ:

Աշակերտները կատարեցին հայկական եւ ամերիկեան ուխտերը, քայլերգները, սաղմոսներ, հայերէն եւ անգլերէն հոգեշունչ ու միաբերան հրաժեշտի երգեր եւ արտասանութիւններ: Ականատես եղանք նաեւ աղջիկներու հեզաճկուն եւ տղոց խրոխտ հայկական պարերուն, որոնք բաւական ճանապարհելէ ետք հասան հայրենիք:

Պահն էր դիտելու տողանցքը շրջանաւարտներուն, որոնք բեմ բարձրացան՝ ստանալու իրենց կեանքին առաջին վկայականները, տնօրէնուհիին եւ դաստիարակ ուսուցիչին միջոցաւ:

Հանդէսը փակուեցաւ տնօրէնուհիին խրախուսիչ խօսքերով եւ բարեմաղթութիւններով:

 Այժմ պահն էր վայելելու նախակրթարանի եւ միջնակարգի աշակերտներուն աւարտական հանդէսները:

 Տնօրէնուհիին եւ ուսուցիչներուն առաջնորդութեամբ՝ աշակերտները տողանցեցին:

Հպարտալի էր լսել շրջանաւարտներուն ուխտերը, քայլերգները, խմբային եւ անհատական արտասանութիւնները, աղօթքները եւ ուղերձները։ Հաճոյքով ըմբոշխնեցինք եւ բաւարարուած զգացինք՝ քաղելով տարիներու կատարուած աշխատանքին արդիւնքը:

Նախակրթարանի եւ միջնակարգի շրջանաւարտները համապատասխան պարգեւներով գնահատուեցան եւ ստացան իրենց վկայականները տնօրէնուհիին եւ դաստիարակներուն ձեռամբ:

Հանդէսին աւարտին, գնահատանքի արժանացան տնօրէնուհին, ուսուցիչները եւ հոգաբարձական կազմը, որոնք անսակարկ նուիրումով ծառայած էին բոլոր տարին:

Տնօրէնուհին վեր առաւ դպրոցիս առաքելութիւնը, որ կը ջամբէ հայեցի կրթութիւն եւ հոգեւոր սնունդ: Ան շնորհաւորեց ծնողները: Ան բարի երթ մաղթեց շրջանաւարտներուն՝ լաւագոյնը ցանկալով անոնց ապագայ ծրագիրներուն մէջ:

Վարձքը կատար տնօրէնութեան եւ պաշտօնէութեան: Նորանոր յաջողութիւններ եւ բարգաւաճում կը մաղթենք, որպէսզի այս դարբնոցը մնայ կանգուն եւ ծառայէ մեր գաղութին:

Վերոյիշեալ բոլոր հանդէսներուն ծնողներուն կողքին ներկայ էին դպրոցիս հիմնադիրներէն Մ. Եուսուֆեան, առաջին տնօրէն դոկտ. Բ. Արոյեան, Ք. Սարեան մանկամսուրի բարերար դոկտ. Մ. Սարեան, հոգաբարձուներ եւ բարեկամներ:

Բոլոր յայտագիրները փակուեցան պատուելիներ Ճ. Մաթոսեանի, Վ. Էքմէքճեանի եւ Մ. Մկրտիչեանի աղօթքներով:

ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ