Հինգշաբթի, 9 Դեկտեմբերի, 2021

Շաբաթաթերթ

Հնատիպ Աստուածաշունչ Մատեանների Ցուցադրութիւն Առաջնորդարանում

Հոկտեմբերի 21-ին Արեւմտեան թեմի Առաջնորդարանի Արմէն Համբար սրահում կազմակերպուեց «Հնատիպ Սուրբ Գրքերի հաւաքածոյի ցուցադրութիւն-ներկայացում»։ Այն Թեմակալ Առաջնորդ Յովնան Արք. Տէրտէրեանի օրհնութեամբ կազմակերպել էր Առաջնորդարանի Թանգարանների եւ Գրադարանի պատասխանատու Հայկ Մադոյեանը, Թանգարանների խորհրդի անդամների աջակցութեամբ։

Բազմաթիւ հաւատացեալ հայորդիներ հնարաւորութիւն ստացան անմիջական հաղորդակից դառնալու հայերիս համար սրբագործուած Աստուածաշունչ մատեանների հնագոյն տպագիր օրինակներին, որոնք Առաջնորդարանի անգին գանձերի շարքին են պատկանում։ Ցուցադրուած էին ի մասնաւորի 1733 թուականին Մխիթար Սեբաստացու տպագրած, 1805 թ. Զոհրապեան, 1860 թ. Արսէն Բագրատունու տպագրած եւ շատ այլ հրատարակութիւններ եւ երկու արժէքաւոր ձեռագիր մատեաններ։

Տիար Ստեփան Ստեփանեանի ողջոյնի խօսքից յետոյ իր մանրամասն բանախօսութեան մէջ Հայկ Մադոյեանը ներկայացրեց Սուրբ գրքի ծագման, բնագիր լեզուների, դրանց փոխյարաբերութեան եւ թեմայի հետ առնչուած շատ այլ հարցեր՝ վկայակոչելով Սուրբ Հայրերի գրուածքները։ Ինչպէս օրինակ՝ «Եկեղեցու սբ․ հայրերն ասում են, որ աղօթքի ժամանակ հիմնականում մենք ենք խօսում Աստծոյ հետ իսկ Սբ․ Գիրք ընթերցելիս՝ Աստուած է խօսում մեզ հետ»։ Հարցուպատասխանի ոճով կառուցուած բանախօսութեան ընթացքում Հայկ Մադոյեանը մանրամասնեց նաեւ հայերէն (գրաբար եւ աշխարհաբար) Աստուածաշնչի ստեղծման հարցերը, արժեւորեց դրանք բնագրագիտական, ձեռագրագիտական կողմերով։ Իր խօսքը եզրափակեց հինկտակարանեան յղումով, որ կարծես նաեւ միջոցառման հիմնական միտքն էր. «Այս օրէնքների գիրքը քո շուրթերից չհեռացնես, այլ գիշեր-ցերեկ դրա մասին մտածի՛ր, որպէսզի գիտենաս կատարել բոլոր դրա մէջ գրուածները»։

Միջոցառմանը համերգային կատարումներով ելոյթ ունեցաւ Ս. Ղեւոնդեանց Մայր Տաճարի «Շնորհալի» դպրաց երգչախումբը, Րաֆֆի Միքայէլեանի խմբավարութեամբ։

Յովնան Արք. Տէրտէրեանն իր օրհնութեան խօսքը բերեց ներկաներին՝ նշելով մի կողմից Սուրբ Գրքի եւ նրա պատգամներով ապրելու կարեւորութիւնը հայ քրիստոնեայի համար, միւս կողմից՝ նման նախաձեռնութիւնների շուրջ ի մի հաւաքուելու արդիւնաւէտութիւնը Աստուածաշնչական սերտողութեան նպատակով, որի համար գնահատանքի խօսք ուղղուեց Հայկ Մադոյեանին ու միւս մասնակիցներին։

Առաջնորդ Սրբազանը նպատակայարմար համարեց նաեւ, որ Աստուածաշունչի մասին դասախօսութիւնների շարք նախաձեռնուի յաջորդող ամիսներին՝ թեմայի շուրջ գիտելիքները շարունակաբար լրացնելու համար։

Եզրափակիչ աղօթք ասաց հիւրաբար Արեւմտեան թեմում գտնուող Տաւուշի թեմի Առաջնորդ Բագրատ Եպս. Գալստանեանը։ Ցուցադրութիւնն աւարտուեց հիւրասիրութեամբ։

Այս առիթով նաեւ տեղին է նշել, որ միայն հայերէնն է, որ փոխանակ Βιβλίο/Bible  ունի «Աստուածաշունչ» անուանումը, ըստ Աւետարանի մի խօսքի. «Ամենայն գիրք աստուածաշունչք եւ օգտակարք՝ ի վարդապետութիւն են, եւ ի յանդիմանութիւն, եւ յուղղութիւն, եւ ի խրատ արդարութեան»։ (Բ. Տիմ. 3։16)

Դիւան Առաջնորդարանի
ՅԱՐԱԿԻՑ ՅՈԴՈՒԱԾՆԵՐ

ԹՈՂՆԵԼ ՄԵԿՆԱԲԱՆՈՒԹԻՒՆ

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

ՆՈՐ ՅԱՒԵԼՈՒՄՆԵՐ