Հինգշաբթի, Մայիս 23, 2024

Շաբաթաթերթ

Երեք Ազգային Կուսակցութեանց Նոր Տարուայ Յայտարարութիւն

Դեկտեմբեր 17, 2021-ի երեկոյեան, ՍԴՀԿ-ի Կլէնտէյլի գրասենեակին մէջ, ՍԴՀԿ-ի, ՀՅԴ-ի և ՌԱԿ-ի Արեւմտեան Ամերիկայի ղեկավարութեան ներկայացուցիչները ունեցան երկժամեայ հանդիպում մը որուն ընթացքին քննարկուեցան գաղութն ու հայրենիքով մէկ մեր ազգային կեանքը յուզող հարցեր: Հանդիպումին ՍԴՀԿ-էն կը մասնակցէին Վազգէն Խոտանեան (ատենապետ), Միհրան Խաչատուրեան, և Վարդան Քէորօղլեան: ՀՅԴ-էն՝ Տարօն Տէր Խաչատուրեան (ատենապետ), Զարեհ Աճէմեան, և Գարեգին Խանճեան: ՌԱԿ-էն՝ Տոքթ. Ռաֆֆի Պալեան (ատենապետ), Կարօ Քիւփէլեան, և Գէորգ Գրիգորեան:

Յատուկ շեշտ դրուեցաւ աննկուն կամքով մեր ազգին դատը հետապնդելու հրամայականին վրայ: Նաեւ այս ծիրին մէջ քննարկուեցան Ցեղասպանութենէն ետք 3-րդ ու 4-րդ սերունդներու հայկական ինքնութեան դէմ այս ափերուն և Սփիւռքի մէջ ցցուող վտանգներու պարագան և անոնց լուծումերուն յաւելեալ որոնման ու կիրառման աշխուժացման անհրաժեշտութիւնները: Որոշուեցաւ միացեալ ճիգերով  համագաղութային կառոյցներուն (AGC, UACLA) թափ տալ կազմակերպելու 2022 թուականի ապրիլեան ոգեկոչումները:

Օրակարգի վրայ էին նաեւ գաղութի ազգային դիմագիծը ներգործօն կերպով առաջ տանելու և երիտասարդութիւնը ներգրաւելու նիւթերը: Նախատեսուած են նաեւ եռակողմանի պարբերական հանդիպումներով երեք կուսակցութեանց համատեղ ճիգերով այլ ազգային օրակարգեր առջեւ տանիլ:

Այս առթիւ Արեւմտեան Ամերիկայի մեր հայրենակիցներուն և ժողովուրդին կ’ուղղենք Նոր Տարուան և Սուրբ Ծնունդի լաւագոյն բարեմաղթութիւնները: Մաղթանքներ առողջութեան, յաջողութեան և կամքի՝ ի խնդիր ազգային իղձերու իրականացման:

Յունուար 9, 2022
ՍԴՀԿ Արեւմտեան Ամերիկայի Վարիչ Մարմին
ՀՅԴ Արեւմտեան Ամերիկայի Կեդրոնական Կոմիտէ
ՌԱԿ Արեւմտեան Ամերիկայի Շրջանային Վարչութիւն
ՅԱՐԱԿԻՑ ՅՈԴՈՒԱԾՆԵՐ

ՆՈՐ ՅԱՒԵԼՈՒՄՆԵՐ