Երուսաղէմի Պատրիարքարանը այսօր հերքեց շրջանառութեան մէջ դրուած բոլոր այն լուրերը, ըստ որոնց Երուսաղէմի Պատրիարք Տ. Նուրհան Արք. Մանուկեան բաց նամակ մը յղած է Ամենայն Հայոց Կաթողիկոս Ն.Ս.Օ.Տ.Տ. Գարեգին Բ.ն Վեհափառ հայրապետին: «Արեւելք» այս խնդրով դիմեց Պատրիարաքարանի դիւանապետ Տ. Յովհան Վրդ. Պաղտասարեանին, որ ըսաւ «Քանի որ վերջերս երկու նոր հոգևորականներ կարգալոյծ եղած են , հին նամակը դրուած է համացանցի վրայ, հաւանաբար կարգալոյծ եղած հոգեւորականներն են, որ այդ մէկը ըրած են կամ շահագրգիռ այլ խումբեր: Հրապարակուածը հին նամակն է: Նոր նամակ չկայ, պատրիարքի հին նամակն ալ այդ վերնագիրը չէ ունեցած»,-նշեց դիւանապետը, ակնարկելով այսօր հրապարակուած «Նուրհան պատրիարքը կաթողիկոսին կոչ է անում կարգազուրկ լինել և եկեղեցին փրկել կործանումից» նոր վերնագրով, բայց հին բովանդակութեամբ նամակը:
Յիշեցնենք, որ՝ Երուսաղէմի հայոց պատրիարք Նուրհան արք. Մանուկեան Ամենայն Հայոց կաթողիկոսին երկու նամակ յղած է, իր անհամաձայնութիւնը յայտնելով շարք մը խնդիրներու վերաբերեալ: Այսօր հրապարակուած են հատուածներ՝ պատրիարքի՝ 2013 և 2014 տարիներուն գրուած նամակներէն: