Շրթունքներու մաշկը նոյնքան խոցելի է արեւու ճառագայթներու նկատմամբ, որքան մարմնի այլ բաժիններու մաշկը՝ անիկա նոյնպէս կրնայ այրիլ, աւելին՝ կրնայ մաշկի քաղցկեղ յառաջանալ:
Շրթունքներու այրուածքներու ախտանիշներ են.
- շրթունքներու կարմրութիւն, ուռուցք,
- շրթունքներու մաշկի բարակութեան եւ խոցելիութեան զգացողութիւն,
- ցաւոտ զգացողութիւններ,
- բշտիկներ շրթունքներուն վրայ, որոնք, ի տարբերութիւն «հըրբըս»-ի, փոքր բշտիկներ են՝ լեցուած հեղուկով, այլ ոչ թէ թարախով:
Ծանր պարագաներուն կրնայ ուռիլ լեզուն:
Սովորաբար, շրթունքներու արեւայրուքը կ՛անցնի 3-5 օրուան ընթացքին, սակայն եթէ քանի մը օր անցնելէն ետք ախտանշանները մնան, կը յանձնարարուի դիմել բժիշկի:
Շրթունքներու մաշկի աւելի արդիւնաւէտ բուժման համար կը յանձնարարուի.
- սառած թրջուած լաթեր դնել շրթունքներուն վրայ,
- օգտագործել «ժել»-եր եւ քսուքներ «ալոէ վերայի էքսթրաքթ»-ով, որ ունի բուժիչ ազդեցութիւն,
- ոչ մէկ պարագայի օգտագործել վազելին եւ նման այլ միջոցներ. արեւայրուքի պարագային ատոնք տաքութիւնը կը պահեն մաշկին վրայ,
- ցաւը թեթեւցնելու համար կարելի է օգտագործել առանց դեղագիրի դեղեր, ինչպէս՝ «իպուփրոֆեն»-ը:
Շրթունքներու արեւայրուքէն խուսափելու համար կը յանձնարարուի օգտագործել շրթունքներու արեւապաշտպան միջոցներ: Մասնագէտները կը յանձնարարեն ընտրել SPF 30 մակարդակի բալասաններ, որովհետեւ ատոնք կը զտեն ուլթրամանիշակագոյն ճառագայթումի մինչեւ 97 առ հարիւրը: Այս մէկը յատկապէս կարեւոր է, եթէ մտադիր ենք օրը անցընել բացօթեայ լողաւազանին կամ ծովափին վրայ:
Afhil.com